DILI (timorpost.com) – Polítika Governu harii Uma Kbi’it Laek (UKL), iha Suku Maskarinhas, Postu Administrativu Vera-krús, Munisípiu Dili, sei iha prosesu verifikasaun hosi Programa Nasionál Dezenvolimentu Suku (PNDS).
Xefe Suku Maskarinhas, Rui Ilidio de Araújo, hatete Uma Kbi’it Laek, iha rua, ida UKL no ida UKL B+, maibé ida UKL primeiru ne’e sira la bele realiza iha Suku Maskarinhas, tanba komunidade sira ne’ebé hela iha Suku Maskarinhas ne’e laiha dokumentu no sertifikadu kona-ba rai.
“Ami so realiza mak UKL B+ ne’e, maibé sei prosesu verifikasaun husi PNDS, hafoin ne’e mak sei realiza, maibé ida sei oferese kalen ho pregu de’it, la hanesan ho UKL primeiru” nia hateten iha knaar fatin, Sede Suku Maskarinhas, Sábadu (19/11).
Nia esplika, Governu liuhusi programa Nasionál Dezenvolimentu Suku (PNDS), tau perioridade ba kalen ho pregu de’it, tanba ne’e iha loron hira liu ekipa PNDS hamutuk kordeiru Suku nian, sei halo verifikasaun ba kada aldeia.
“UKL segundu B+ ne’e, kada aldeia iha uma neen mak sei hetan, tanba ami iha aldeia neen, entaun signifikan, ami sei hetan hamutuk 36, maibé ida ne’e foin mak verifikasaun, atu realiza hira ne’e, depende ba verifika husi PNDS nian,” nia dehan.
Nia hatutan, UKL primeiru sira identifika ona, maibé atu ba prenxe rekezitu mak la pasa, maibé sira ne’e merese atu hetan UKL, mais maioria komunidade sira hela iha Suku Maskarinhas ne’e, laiha dokumentu no sertifikadu kona-ba rai, tanba ne’e la konsege realiza, nune’e mós tantu ba UKL B+ mós sira identifika ona, maibé daudaun ne’e sei iha verifikasaun husi PNDS.
“Ita-nia komunidade sira ne’ebé iha aldeia identifika ne’e, merese duni atu hetan UKL, maibé atu tama ba faze kriteria ne’e mak hela hotu, tanba de’it sertifikadu, maibé ba UKL B+, ekipa husi PNDS, hatete importante iha CCN nia dokumentu, ezemplu hanesan ita-nia uma ne’e sukat tiha no mós foti ona baze dadus husi CCN,” nia dehan.
2,143 total views, 30 views today
Bele hare Video Seluk :