Dili (timorpost.com) – Negosiante Márcia Soares, preokupa fan tomate iha Merkadu Manleuana la folin.
“Ami loron-loron mai fan tomate iha ne’e maibé ema la mai sosa ida”, nia hateten ba Online Timor Post, iha Merkadu Manleuana, Sábadu (19/11).
Nia dehan, dala-ruma ema la sosa tanba sira fan liu iha laran.
Nia hatutan, agora ema barak mak fan protudu lokál inklui tomate iha fatin-fatin no balun uza gerobak dudu sai no tama bairru, ho ida ne’e maka difikulta ba sira ne’ebé fan iha Merkadu Manleuana.
“Ami dadersan tuku 6:00 iha Merkadu ne’e ona to’o tuku 6:00 kalan maka ami foin fila ba uma, maibé ema la mai sosa ami-nia tomate”, nia informa.
Nia konta, fan iha ne’e lor-loron mós ema la sosa ida, ne’ebé osan sai iha, maibé osan tama laiha.
“Iha ne’e ami fan tomate fuan neen ka hitu ho presu 0,50 sentavus, maibé ema la mai sosa ida”, nia preokupa.
Nia haktuir, uluk sira sei fan iha estrada ninin ne’e ema ba sosa sira-nia sasán, maibé Autoridade Munisípiu Dili, liuhusi nia ekipa muda fali sira ba iha Merkadu parte laran liu ne’e mak ema la ba sosa ona.
Bainhira loron ida ema atu ba sosa sira-nia sasán mós so sorte de’it, karik loron ida mak sorti laiha, entaun loron tomak sira la hetan liu 0,1 sentavus ida.
“Kuandu ema la hola ne’e ami-nia sasán, tomate dodok tiha no balun ami uza hodi halo modo para han de’it”, nia afirma.
Enkuantu sira ba foti ka sosa tomate iha Merkadu Taibesi ho raga ida 40 USD, tanba ne’e sira sente todan se ema la Sosa.
Ikus nia dehan, osan sira ne’ebé nia hetan husi Fan produtu ne’e nia uza hodi sustenta nesesidade família no selu kos.
2,562 total views, 3 views today
Bele hare Video Seluk :