Reportajen Estaziada Ermelinda Caet /Asistente Editor Hermenegildo Tilman
Dili (Timor Post)—Atu tama ba eleisaun Órgaun Suku ne’ebe mak sei realiza iha tinan 2023, Governu liuhusi Ministériu Administrasaun Estatál (MAE), sei propoin orsamentu ba kada suku, maibé montante husi orsamentu hira seidauk hatene, tanba sei hein aprovasaun husi Konsellu Ministru.
“Eleisaun Órgaun Suku iha tinan 2023 sei organiza husi suku rasik, la’ós organiza husi STAE. Tuir dekretu Lei No. IX/2016 “Lei Suku” hodi entrega kompeténsia tomak hala’o eleisaun órgaun suku iha suku ida-idak iha munisípiu no Rejiaun Autonomia Espesiál Oekusi-Ambenu (RAEOA)”. Hateten husi Ministru Administrasaun Estatál Miguel Pereira de Carvalho ba Jornalista sira iha Novo Turizmu, Sesta (17/ 06).
Nia afirma, Lei Suku iha kapítulu IV ho tópiku dezignasaun membru órgaun suku nian, seksaun I: eleisaun ba delegadu/a husi aldeia ba konsellu suku hodi hili xefe aldeia iha artigu 34-42. Seksaun II: Eleisaun ba xefe aldeia iha artigu 43-51. Seksaun III: eleisaun lia na’in iha artigu 52-63. Seksaun IV: Eleisaun ba reprezentante juventude sira iha artigu 55-63. Seksaun V: Eleisaun ba Xefe Suku iha artigu 64-72.
Tuir Planu kalendáriu Ministerial MAE nian, kona ba data no fulan hodi realiza eleisaun Suku iha territóriu Timor laran sei monu iha fulan Novembru ou Dezembru 2023 tinan oin. Nia dehan.
“Kona-ba orsamentu ita seidauk hatene, maibé ami sei prevee osan hira ba eleisaun suku nian, maibé tama ona iha faze elaborasaun planu MAE nian”, Nia tenik. (Lee Notísia Seluk Iha Jornál Post /Asesu You Tube Timor Post).
525 total views, 9 views today
