DILI (Timor Post)—Tribunál Distritál Dili (TDD), liu hosi julgamentu primeiru interrogatóriu, Sesta (06/08), aplika medida koasaun prizaun preventiva ba arguidu ho inisiál JS, tanba prova iha indísiu krime omisídiu Tentada, hasoru nia kaben iha Aldeia Caileulea, Suku Metagou, Postu Bazartete, Likisá.
Tuir Informasaun ne’ebé Timor Post, asesu arguidu nia defeza, advogadu Nelson Borges, informa kazu ne’e akontese iha loron 02 Fulan Agostu 2021, maizumenus tuku 11:00 dadeer, uza katana taa nia kaben rasik hetan kanek grave isin lolon.
Enkuantu, ministériu Públiku akuza arguidu komete krime 3 kompostu hosi krime Omisídiu Tentada, Arma Branka no Ofensa Fízika ho nia agravasaun Violénsia Doméstika ne’ebé previstu iha lei kódigu penal Timor-Leste.
“Kuandu iha prosesu julgamentu, tribunál entende katak iha duni indísiu ba krime ne’ebé ministériu Públiku promove ba arguidu, tanba ne’e mak tribunál deside aplika medida ne’ebé adekuadu mak medida koasaun prizaun preventiva,” dehan Advogadu.
Defeza haktuir katak, iha audiénsia Julgamentu Primeiru Interrogatóriu, arguidu konfesa parsiál, katak nia halo duni asaun krime hasoru nia kaben.
Tanba ne’e defeza sei la halo rekursu, maibé kuandu família hakarak halo rekursu hasoru desizaun primeira instánsia, mak iha prazu loron 15 nia laran, defeza prontu halo rekursu.
Ikus, ba audiénsia prezide hosi juis turnu Albertina Neves, parte Ministériu Públiku reprezenta Ofisial prokuradór titular na’in ida, no arguidu hetan asisténsia legal hosi defeza, Nelson Borges. (jxy)
1,792 total views, 3 views today
Bele hare Video Seluk :
Subscribe to Timorpost
