(Reportajen Jaime Pires/Editor Mateus da Cruz)
DILI (Timor Post)- Primeiru Ministru (PM), Taur Matan Ruak halo lansamentu fatuk dahuluk ba Konstrusaun Timor Marina Square (TMS), iha Antigu Rezidénsia Francisco Xavier do Amaral, Largo Lesidere.
“Ho haksolok no satisfasaun boot, ohin loron ha’u partisipa iha serimónia lansamentu fatuk dahuluk nian ba Konstrusaun Timor Marina Square,” dehan Taur iha nia diskursu, Tersa (17/05).
Nia hatete, Projetu konstrui Timor Marina Square konkretiza prioridade sira nasaun nian iha prátika no iha posibilidade hodi kumpre objetivu nasionál sira ida ne’ebé boot, ho projetu privadu ida, ne’ebé finansia husi fundu internasionál sira ne’ebé posibilita aparesimentu operadór ekonómiku foun ida iha setór turizmu nian.
Infraestrutura foun ida ne’e moderna, efisiente, sustentavel iha nivel ekonómiku no ambientál, ne’ebé sei disponibiliza la’ós ba de’it servisu foun sira ba sidadaun, turista, investidór no emprezáriu sira ne’ebé vizita, liuhusi otél, restaurante, estabelesimentu komersiál no apartamentu sira, maibé mós oferta oteleira sira nasaun nian ne’ebé di’ak no kualidade servisu nian sira ne’ebé fó ba utente sira.
“Projetu ida ne’ebé marka ritmu kreximentu no progresu nian ne’ebé ita dezeja ba nasaun, ho inovasaun barak liu, kriatividade barak liu, empreendedorizmu privadu barak liu, hodi estimula aparesimentu jerasaun traballadór foun ida ne’ebé kualifikadu no operadór ekonómiku sira,” nia dehan.
Tuir Taur, investimentu ida ne’e kontribui duni ba objetivu boot sira Governu nian ne’ebé mak ezije husi sidadaun sira, liu-liu joven sira, ne’ebé buka oportunidade foun sira kona-ba formasaun no empregu nian, tanba bele hasa’e sira nia abilitasaun no kompeténsia sira, no mós fonte sira rendimentu nian, moris di’ak no kualidade moris nian.
“Kompleksu Timor Marina Square reprezenta kreximentu no modernu ne’ebé ita hakarak tebes ba ita-nia nasaun investimentu ida ne’ebé ho dolar Amerikanu Millaun 50, eskluzivamente privadu, investe ona iha ita-nia rain, ne’ebé hatudu kompromisu no konfiansa husi investidór externu sira, ba ita-nia futuru ne’ebé koletivu,” afirma
Tanba Timor-Leste nasaun ida ne’ebé akolhedór, seguru no pasífiku ho oferta sira diferente no potensialidade sira iha setór turizmu, agrikultura, peska, indústria, komérsiu no servisu nian sira, ne’ebé sei fó benefísiu ba komunidade ho prezensa hosi polu foun ida-ne’e ba dezenvolvimentu urbanu.
Ho inisiativa ida-ne’e sei kria 170 empregu imediatu diretu, ne’ebé sei realiza obra sira konstrusaun nian. Tuirmai, durante faze operasionál sei kria empregu 250 ne’ebé liga diretamente ba projetu.
“Ita fiar katak ho prezensa infraestrutura ida-ne’e iha Lecidere, Dili, sei loke oportunidade foun empregu no negósiu nian sira, hodi hamosu vaga sira atus ba atus iha servisu sira apoiu nian, iha transporte, iha komérsiu, iha lojístika no iha servisu tékniku-finanseiru sira,” nia hateten.
Tanba ne’e, nia hakarak agradese ba Reprezentante husi Empreza Timor Marina Square S.A., no ba CEO hosi Empreza “A-Smart Holdings Ltd”, Liam Huan Chiang, ba investimentu ne’ebé realiza iha Timor-Leste no iha Timoroan sira, hodi renova ita-nia disponibilidade atu kontinua servisu hamutuk hodi konkretiza projetu ida-ne’e no projetu investimentu nian sira seluk. (Lee Notisia Seluk Iha Jornal Timor Post/ Asesu You Tube Timor Post)
676 total views, 3 views today
Bele hare Video Seluk :
Subscribe to Timorpost
