DILI (timorpost.com) – Koordenadór Jestaun Merkadu Taibesi, António Manuel de Araujo, hatete relasiona ho fatin akontesimentu insendiu Merkadu Taibesi, komunidade obrigatóriu tenke husik fatin akontesimentu ne’e, tanba ne’e Rai Estadu ka Governu nian.
Nia dehan, relasiona ho akontesimentu insendiu iha merkadu Taibesi, Kinta (22/12), oras tuku 11:30, rezulta uma-kain hamutuk 53 ho total família hamutuk 347, hahú husi Labarik to’o ema boot tenke lakon hela fatin.
“Fatin ne’ebe vítima sira hela ne’e, fatin provizóriu de’it, liga ba fatin akontesimentu insendiu ne’e rai Merkadu nian ka Estadu la’ós rai privadu, komunidade tenke hatene se Rai Estadu ne’e Estadu nian, tanba ne’e tenke husik”, dehan nia ba Timor Post Online iha knaar fatin Merkadu Taibesi, Tersa (27/12).
Nia dehan, Rai ne’e la’ós autoriza komunidade hela permanente, ne’e rai Estadu halo ba ema hotu hodi faan sasán, la’ós halo uma hodi komunidade uza hanesan rai privadu, ne’e lei la fó dalan.
“Ida ne’e, ita hotu-hotu tenke hatene liuliu ita-nia komunidade sira ne’ebé okupa fatin ne’e, agora ahi han ona komunidade sira-nia uma ne’e, família sira ezijensia atu mai fali fatin ne’e, ligadu ba fatin ne’e komunidade sira labele hela ona iha fatin refere”, deklara nia.
Nia informa, ohin sira hamoos fatin atu halo konstrusaun, maibé ne’e labele husik fatin ne’e mamuk tanba ne’e Estadu nian.
Nia esplika, fatin ne’ebé vítima hela ne’e maioria la’ós negosiante, maibé ema hela ne’e komunidade ka estudante sira ne’ebé mai hala’o estudu iha Dili.
“Sira-nia preokupasaun atu mai fali fatin ne’e, maibé ami ho seguransa PNTL halo intervensaun katak fatin ne’e la autoriza ona ba komunidade atu hela ona, husik mamuk atu haree ba futuru merkadu nian”, katak nia.
Tanba ne’e, nia dehan, komunidade ida-idak tenke fila-fali ba sira-nia Munisípiu ida-idak nian. Tanba iha akontesimentu ne’e la’ós ema negosiante.
Nia hatete, karik komunidade la kumpre, sei aplika Lei artigu 32/2018, katak sidadaun ne’ebé hela iha rai Estadu obrigatóriu tenke sai husi fatin refere.
1,119 total views, 6 views today
