DILI (timorpost.com) — Polisia Nasionál Timor-Leste (PNTL), forma ona ekipa ida atu halo investigasaun ba kazu inséndiu ahi han mutuk uma 54 iha Merkadu Taibesi, iha loron Kinta-feira kalan (22/12).
Portavós Komandu Jerál PNTL, Superintendente Xefe Polisia Arnaldo de Araújo, informa relasiona ho preokupasaun Prezidente Repúblika (PR), José Ramos Horta nian, sira-nia parte forma grupu atu halo investigasaun ba kazu inséndiu ne’ebé akontese iha merkadu Taibesi.
“Inséndiu ne’ebé akontese iha Merkadu Taibesi ne’e, ita-nia Komandu Polisia Nasionál Timor-Leste Munisípiu Dili, ba ona halo verifikasaun iha ne’ebá, ita ba haree vítima sira-nia sasán saida mak hetan estragus no buka sasin hodi foti dadus no oinsá atu deskobre kona-ba motivu husi inséndiu ne’e,” dehan Arnaldo ba jornalista sira iha Kuartél Jerál PNTL, Kaikoli, Kuarta (28/12).
Antes ne’e, iha loron selebrasaun Natal, 25 fulan Dezembru tinan ne’e, Prezidente Repúblika (PR), Jose Ramos Horta, halo vizita ba vítima inséndiu iha merkadu taibesi.
Nia dehan, vizita ne’e hodi haree besik liu kondisaun família uma kain-54 ne’ebé sofre direita inséndiu iha Taibesi, tanba ne’e nia husu Polisia Nasionál Timor-Leste (PNTL) halo investigasaun kle’an hodi deskobre motivu husi inséndiu ne’e.
Prezidente Repúblika, hatete nia parte ohin mai haree informasaun de’it, maibé parte autoridade Governu, Bombeiru, PNTL sira mak halo investigasaun hodi hatene loloos, motivu husi akontesimentu ida ne’e.
1,748 total views, 3 views today
Bele hare Video Seluk :