DILI (Timor Post) – Ministru Administrasaun Estatál (MAE), Miguel Pereira de Carvalho, hatete sira halo ona preparasaun atu simu Kardeál Dom Virgílio do Carmo da Silva, atu fila hikas hosi Roma Itália mai Timor-Leste.
“Ami durante fulan ida ona hahú prepara hodi simu Kardeál Dom Virgílio do Carmo iha Aeroportu Internasionál Nicolau Lobato, iha loron 05 fulan Setembru ne’e,” nia hateten iha Palásiu Governu, Kuarta (17/08).
Nia dehan, sira komesa halo ona preparasaun, masi antes ne’e sira mós diskute ona kuandu fila atu halo atividade saida hodi simu.
“Komisaun komesa prepara ona tenda, kadeira, Meza sira inklui parte Protokolu ninian no konvite sira hotu, tanba sei halo misa boot iha Tasi-Tolu,” hateten nia.
Miguel subliña, iha tempu besik ne’e sei halo ona tenda iha Tasi-Tolu área uma adat ninian hodi halo misa boot iha loron 06 fulan Setembru.
“Atu konvida se-se seidauk hatene klaru, tanba komisaun ne’e husi parte Governu no igreja nian mak hamutuk, Prezidente Komisaun Organizdora mak Padre Guilhermino da Silva,” hateten nia.
Ikus nia dehan, kona-ba orsamentu preparativu ba ida ne’e seidauk bele ko’alia sai tanba planu sira ne’e seidauk deside loos hotu, kuandu loos hotu ona bele fó sai.
3,032 total views, 3 views today
Bele hare Video Seluk :