Dili (Timor Post) – Country Director Plan Internasionál Timor-Leste (PITL), Dillyana Ximenes, hatete sira ko’alia ho Prezidente Repúblika, José Manuel Ramos Horta, kona-ba labarik feto ida atu hola pozisaun nu’udar Prezidente, no suporta Plan ne’ebé durante iha ona.
“Ami hasoru Prezidente, ko’alia asuntu rua, asuntu dahuluk atu apresia ba suporta Plan ne’ebé durante iha ona, no mós apresia ba prezidente hakarak atu labarik feto ida hola pozisaun nu’udar prezidente, hodi komemora loron mundiál ba labarik feto”, nia hatete hafoin remata enkontru ho Prezidente, iha Palásiu Prezidensiál, Kuarta (17/08).
Nia dehan, Loron Mundiál ba Labarik feto ne’e, sei monu iha loron 11 fulan Outubru, kona-ba data sira ne’ebé oan feto sira ne’e bele mai hola pozisaun, ida ne’e hasoru ona husi prezidente.
Nia mós hakarak agradese tanba fiar ne’ebé Prezidente fó ba Plan, atu la’o hamutuk halo kampaña espesiál iha munisípiu Ainaru, liga ba atu hasa’e nutrisaun no hamenus mal-nutrisaun iha Ainaru.
Nia afirma, kona-ba labarik feto ne’ebé atu hola pozisaun hanesan Prezidente, ne’e hanesan sei iha tinan rua liubá, husi munisípiu Ainaru, Maubisi, no tinan ida ne’e Plan Internasionál sei haree, karik fila fali husi munisípiu Aileu.
“Maibé iha fatin ne’ebé de’it, hanesan Aldeia ou Suku ne’ebé ami seidauk hatene, nune’e ami-nia labarik sponsor sira ne’ebé durante ne’e hamutuk ho Plan. Plan la’ós ami mesak de’it, maibé ho parseiru barak ne’ebé ha’u la temi naran iha ne’e, portantu ita-nia na’i ulun sira iha Governu, ita-nia na’i doadór sira, organizasaun sosiedade sivíl, tantu lokál mós internasionál, serbisu hamutuk atu bele asegura katak, ita-nia oan feto no mane sira ho diversidade bele goza sira-nia diretu ho di’ak,” nia relata.
Alende ne’e, ba Plan Internasionál nia Meta ne’ebé atu avansadu diretu labarik, no igualdade ba labarik feto, entaun iha Plan Internasionál nia programa hotu-hotu, liuliu labarik ho diversidade sai alvu ba atividade hotu ne’ebé iha.
Kona-ba serbisu ne’ebé la tuir labarik sira-nia idade, saida mak sira halo, liuhusi Plan Internasionál nia atividade sira hanesan, foku ba protesaun labarik, entaun atu hanorin no fó koñesimentu ba Inan-Aman sira, komunidade, kona-ba nusa bele fó protesaun ne’ebé di’ak ba labarik sira bazeia ba sira-nia idade.
“Ita ema inklui labarik sira iha diretu ba partisipasaun, entaun tuir sira-nia idade, sira bele partisipa iha atividade saida de’it, ne’ebé iha sira-nia moris,” nia dehan.
Nia haktuir, hanesan labarik sira hamriik iha lurón, fa’an sasán, tuir Country Director Plan Internationál, Dillyana Ximenes nia hanoin saida mak Plan International halo ho sira-nia parseiru sira ne’ebé Dillyana la temi ida-ida, nafatin halo liuhusi atividade balu, atu fó hanoin ba Inan-Aman sira.
“Foku ba labarik sira tenke eskola, tenke hetan hahán ne’ebé sufisiente, sira tenke iha tempu atu halimar, kuandu sira atu partisipa ba iha atividade ekonomia ruma, ne’e mós tenke hala’o tuir sira-nia hanoin, depois sira bele ajuda uitoan bazeia ba sira-nia idade,” nia afirma.
Hafoin Enkontru, Country Director Plan Internationál, Dillyana Ximenes, afirma Prezidente ohin simu asuntu ne’e ho pozitivu, no prontu atu labarik feto ne’e bele hola pozisaun iha momentu ruma, no hala’o nia knaar nu’udar Prezidente, no Prezidente sei iha nia sorin hodi akompaña.
“Nune’e Prezidente mós fó fatin iha resintu oin, atu bele selebrasaun ba loron internasionál ba labarik feto nian, no mós fó fatin balu iha ne’e, hodi labarik feto sira ne’ebé kuaze 40 liu sei mai husi munisípiu Aileu, Ainaru, Kovalima, RAEOA no mós Baukau, atu bele enkontru iha salaun balu ne’ebé iha Palásiu ida ne’e,” nia hokotu.
6,642 total views, 6 views today
Bele hare Video Seluk :