Reflexaun badak ba domingo II tempo Paskoa no Domingo Divina Meserikordia nian. Act. 4, 32-35; Sal. 117; 1Jo. 5, 1-6; Jo. 20, 19-31)
Hosi: Luis Pereira SJ
Kontexto!
Ita tama ona ba domingo daruak tempo Paskoa nian. Domingo ida ne’e, konhese mós núdar Domingo Divina Miserikordia.
Liturjia konvida ita reflete konaba Miserikordia laiha limite, laiha kondisaun husi ita nia Maromak domin nain. Ita bele esperiensia ida ne’e, iha pessoa Jesus-Kristo nian. Jesus Kristo Moris Hias mosu ba nia discipulo sira. Hahu kedas husi mosu ba Maria Madalena ne’ebé husi nia Jesus duni sai demonio sira; mosu ba discipulo sira iha dalan ba Emaus ne’ebé lakon esperansa, desanimo; mosu iha tasi ibun ba discipulo balun no ita sei rona mós nia mosu ba discipulo sira iha uma laran iha ne’ebé discipulo Tomé mós iha ne’ebá. Sira hotu koko ona miserikordia no domin Maromak nian.
Jesus nia Moris Hias hatudu katak Nia manan ona forsa mate nian no lori esperansa ba moris no moris rohan laek. Nuné nia moris núdar dom gratuita ida ne’ebé hatudu domin no miserikordia divina Nai Maromak nian ba humanidade.
Ponto 3 ita bele reflete hamutuk:
1. Paz hela ho imi!
Jesus kumprimenta nia discipulo sira hodi dehan: Paz hela ho imi. Hanesan ita hatene katak discipulo sira liu tiha Jesus nia mate, sira iha situasaun tauk, desanimo, lakon diresaun, lakon esperansa, triste, no la hatene atu halo sá ló ho moris.
Jesus nia kumprimenta ne’e, fo hikas ba sira buat ne’ebé sira falta no buat ne’ebé sira preciza liu iha momento ne’ebá mak paz:paz interior no exterior. Iha ita nakukun sira moris nian, ita preciza Jesus-Kristo nia lai fuan: Paz hela ho imi. Ita preciza paz interior no exterior. Se Jesus nia paz hela ho ita, ita sei sai paz nain ba ita nia maun-alin sira.
Tamba ne’e, mai ita besik ba Jesus-Kristo Moris Hias, rona nia kumprimenta, husik nia tama iha ita nia uma laran moris nian. Atu nuné, ita bele sai brani, hetan forsa, hetan naroman no moris hias husi ita nia tauk no desanimo moris nian.
2. Tomé nia duvida no fiar
Discipulo Tomé mak figura interesante ida ne’ebé Saun Joaun aprezenta mai ita. Tomé fiar iha moris hias husi mate sira. Maibé, nia hakarak verfika, se Kristo Moris Hias duni ka lae. Nuné, nia preciza prova/bukti atu bele to’o ba fiar. Nia dehan “ha’u la haré karik besi-kusan fatin iha nia liman, ha’u la hatama karik ha’u liman iha nia sorin kanek, ha’u sei la fiar”. Tebes, atitude Tomé nian ne’e, reprezenta ema wain ne’ebé buka ‘provas’ iha sira nia fiar ka iha sira nia dalan lao tuir Jesus iha tempo moderno agora. Laos ladiak atu uza ita nia razaun hodi buka kumpriende ita nia fiar.
Ita preciza razaun, basá, ne’e dom ida ne’ebé Naí Maromak Kriador haraik ba ema. Ita preciza razaun atu fo naroman ba ita nia fiar no fiar atu konvence ita nia razaun. Resposta interesante ida ne’ebé Jesus fo ba Tomé mak: “Rahun diak ba sira ne’ebé la haré, maibé fiar.
Ita hotu ne’ebé fiar iha Jesus-Kristu Moris Hias, maibé la haré, la preciza ‘provas’, hetan ‘chamada’: rahun diak. Rahun diak tamba Divina Miserikordia Naí nian.
3. Espirito Santo
Jesus-Kristo Moris Hias hu’u iss ba discipulo sira hodi dehan: “Simu Espirito Santo ba!. Sira ne’ebé imi perdua sira salan, sira hetan duni perdaun ba sira salan. Sira ne’ebé imi la perdua sira salan, sira la hetan duni perdaun ba sira salan”. Nuné, Apostolu sira kontinua misaun Jesus nian ho forsa Espirito-Santo nian atu ba mundu tomak hodi haklaken Lia-Foun diak: Kristu Moris Hias ba ema hotu.
Tamba ne’e, mai ita loke fuan atu simu miserikordia no domin ne’ebé Jesus-Kristo oferese ba ita. Mai ita ba buka nia perdaun ba ita nia salan no fiar iha nia domin laiha kondisaun. Atu nuné, ita bele sai instrumento paz, miserikordia, perdaun Jesus-Kristo Moris Hias nian ba ita nia maun-alin sira. Ita labele duvida iha domin Maromak nian ba ita. “Tan o haré mak o fiar!
Rahun diak ba sira ne’ebé la haré maibé fiar. Laiha Pekado/salan ne’ebé bót liu fali miserikordia Maromak nian atu perdua ita. Amen. Amdg! (lupersj)
(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)
1,440 total views, 18 views today
Bele hare Video Seluk :
Subscribe to Timorpost
