ATAURO, (timorpost.com) Iha tuku 8:00 dader ne’e komunidade ho lia-na’in akompaña husi autoriedade lokál, xefe suku, xefe aldeia iha munisípiu Atauro entuziazmu ba konsentra hamutuk iha Portu Beloi hodi hein vise Ministru Administrasaun Estatál (Vise-MAE), Jacinto Rigoberto de Deus, ho membru governu sira seluk, hodi tomada de pose ba Prezidente Autoriedade Munisípiu Atauro.
Tuir observasaun Timor Post iha Sesa, (09/02) nota katak, delegasaun Vise-MAE husi desloka husi Dili to’o Atauro iha tuku 7:00 dader ho ró Marítima to’o iha Portu Beloi. Hafoin to’o iha portu Beloi no simu husi komunidade no autoridade lokál no akompaña Governante sira ba deskansa no hemu bee-manas ruma iha Hotel Vila Gracia Maumeta, iha minutu balun nia-laran liu kedas ba edifísiu Administrasaun Estatál Munisípiu Atauro hodi fo tomada de pose ba Prezidente Autoriedade Munisípiu Atauro, Mateus Belo, ho nia diretór husi liña ministeriál sira hotu iha munisípiu Atauro.
Enkuant iha tuku 9:50 lia-nain no komunidade sira konsentra hamutuk iha edifísiu MAE Atauro hodi hatudu tebe-dai tuir lisan Atauro nian hodi simu Vise-MAE no Prezidente Autoriedade Munisípiu Atauro foun ho administradór sesante ho kometiva tomak.
Iha serimónia tomada de pose iha mós lia-fuan agradesimentu husi administradór sesante no entrega mós termu servisu ba Prezidente autoridade foun ho nia estrutura.
Serimónia ne’e partisipa mós husi embaixadór Indonézia iha Timor-Leste, Diretór Jerál no Nasionál, Komandu PNTL Atauro, parte Igreja, Bombeiros no estudante sira.
Aliende ne’e partisipa mós husi autoridade lokál hanesan administradór, xefe suku, xefe aldeia no komunidade sira.(*)
1,098 total views, 6 views today
Bele hare Video Seluk :
Subscribe to Timorpost
