DILI, (timorpost.com) — Selebrasaun loron Proklamasaun independénsia 28 Novembru husi tinan 1975 to’o 2023 selebra ona ba dala-48 no Restaurasaun Indepndénsia hahú husi 2002 to’o ohin loron, kompromísu luta nain sira-nian ba libertasaun povu ba moris di’ak seidauk atinji, tanba ne’e iha selebrasaun ne’e ukun-nain sira tenke halo reflesaun, saida mak halo ona povu hafoin ukun-an.
“Loron Independénsia 1975, maka fundamenta Timoroan sira nia luta hasoru invazór Indonézia durante tinan 24 nia-laran, iha luta naruk ida-ne’e ita-nia maun sira uluk lidera funu hanorin hela ami ba buat rua, liberta pártria no liberta povu, pátria hetan ona, maibé hafoin restaurasaun 2002 mai to’o 2023 ida-ne’e kompleta tan tinan 24, maibé kompromisu luta heroi sira nian liberta povu atu moris di’ak seidauk atinje, ne’ebé ba ha’u atu hatete de’it hanesan ne’e selebrasaun 28 Novembru tinan ida-ne’e nu’udar reflesaun ida ba ukun na’in sira saida maka sira halo ba povu hafoin restaurasaun ne’e”, Veteranu, Filomeno Hornai, ho kódigu ‘Travolta’ hatete bainhira dada lia ho Timor Post, iha nia residénsia Kampung Baru, Tersa, (21/11/2023).
Membru Organizasaun Rezisténsia FITUN ne’e hatete “Ha’u pesoál hanesan envolve iha klandestina ita sente triste ho deklarasaun sira ne’ebé membru Governu da-IX balu fó sai iha públiku dehan saida maka povu ho joven fó ona ba estadu, ida-ne’e konseitu idolojia rai seluk nian, ita Timoroan ne’e uluk luta ho konsetu rasik, ne’ebé ita-nia herois sira tula hela mai ita maka liberta pátria no liberta povu ba moris di’ak no dígnu iha Independénsia, ne’ebé governante sira lebele husu fali saida maka povu atu fó”.
Nune’e nia kestiona katak lider polítiku sira ne’ebé fó sai deklarasaun hirak ne’e ba povu, ne’e dalaruma nia moris tomak, moris hela iha ema-nia rain no agora aproveita ukun-an para hetan previleiju.
Tanba ne’e, nia hatete Governante sira mak tenke administra no halo finanséiru ba sustentabilidade estadu ida-ne’e nian atu povu bele moris di’ak, ne’e depende ukun na’in sira.
Vetetanu Travolta, husu ba maun sira ne’ebé uluk lider luta iha invazaun to’o mai Restaurasaun Independénsia iha tinaan 2002, liuliu lider rezisténsia, lider klandestina no diplomátiku, tempu ona tuur hamutuk hodi limbra fila-fali kompromisu heroi sira nian hodi liberta povu husi ki’ak no mukit. Tinan-tinan Governu hasai osan husi fundu petrolíferu maibé realidade povu ladún sente nia benefísiu.
“Tinan-Tinan Governu hasai Billaun $1 USD até besik Billaun $3 USD, ne’ebé iha debate temi povu nia osan, maibé ibun temi povu más liman kumu metin iha bolsu, povu kontinua ki’ak iha nia rai, ne’e maka akontese”, Filomeno”Travolta”, preokupa.
Timoroan ho idade produtivu sira komesa buka moris iha ema-nia rain, dook husi família hodi hadi’ak moaris, tanba de’it kampu servisu laiha.
Governu la orienta povu atu halo servisu para bele hadi’ak ekonomia uma laran, Governu la ajuda empreza Timoroan sira investe iha área produtivu para fó servisu ba Timoroan, tanba ne’e, ukun-nain sira tenke tuur hamutuk hodi liberta povu husi ki’ak no mukit.(*)
492 total views, 3 views today
Bele hare Video Seluk :
Subscribe to Timorpost
