DILI, (timorpost.com) — Padre Selebrante Venâncio da C. Pereira, S.J. hatete, Timor lakon saudózu Amândio de Sa Benevides, nu’udar ema ida ne’ebé kualidade iha Ministériu Justisa maibé manán klamar ida iha lalehan ne’ebé fó dalan no naroman ba Timor.
Pe. Selebrante ne’e hatete, Saudozu Amândio de Sá Benevides, fulan neen (6) de’it sai Ministru Justisa, nia koko funsaun ho kna’ar meer, siin, moruk no midar.
“Ita lakon ema ida iha mundo kualidade Ministériu Justisa, maibé ita manán klamar ida iha lalehan ho kualidade timoroan ida no Katólika oan ida no nia frakeza umana hanesan ema, ho situasaun ne’e hotu ne’ebé koko atu sai dalan oan ida iha Ministériu Justisa, koko atu sai naroman oan ida iha partidu CNRT no buka atu sai bee-matan ne’ebé fó netik satisfasaun ne’ebé mak hamrook kona-ba justisa no kona-ba asuntu moris patria, povu no hanesan nasaun,” dehan Pe. Venâncio hafoin prezide misa solene ba saudózu Amândio de Sá Benevides, iha kapela semitériu públiku Bekusi, Segunda, (22/01).
Padre ne’e hatutan, “Ha’u reza no ha’u hein katak maun Amândio de Sa Benevides iha fulan neen laran koko sai dalan iha Ministériu Justisa, buka sai naroman iha Ministériu Justisa”.
Agradese ba di’ak tomak ne’ebé saudózu ou matebian konsege ho kbi’it hanesan ema partilla ba ema ida-idak, iha nia prezensa moris nian, liuliu periodu ikus iha fulan 6 nia-laran hanesan Ministru ba Governu periodu ida-ne’e. Agradese mós ba di’ak tomak ne’ebé fahe ona ba família, amigu, partidu, Governu, Estadu no Povu ida-ne’e.
Amu-lulik ne’e hamutuk nai-lulik sira seluk fó nafatin korajen ba faluk, oan kiak no família sira.
Iha serimónia funebre ne’e partisipa husi Priméiru Ministru, Prezidente Tribunál Rekursu no membru Governu sira, partisipa mós husi membru Parlamentu Nasionál, inklui família, amigu, kolega no parente sira hotu.(*)
597 total views, 6 views today
Bele hare Video Seluk :
Subscribe to Timorpost
