DILI(TimorPost)–Hospital Nasionál Guido Valadares (HNGV), oras daudauk enfrenta krize, problema ne’e sei impaktu ba atendementu pasiente sira ne’eb’e halo tratamentu iha fatin ne’ebá.
Diretór Ezekutivu Klínika HNGV, Marcelino Correia, hatete, agora daudaun médiku espesialista ativu na’in 65 maka agora daudaun halo hela servisu iha HNGV.
“Ita agora menus los pesoál iha HNGV, médiku jerál iha HNGV hamutuk liu atus ida no médiku Espesialista 65, númeru ida ne’e la sufisiente atu atende pasiente iha tempu loron no kalan,” nia dehan ba Timor Post, iha HNGV Sesta (10/03).
Nia hatete, problema menus médiku jerál tanba foin lalais Ministériu Saúde loke vaga ba professional saúde hodi ba hasai estudu espesialista iha estranjeiru, nia rezultadu iha médiku jerál na’in 93 hosi HNGV mak pasa no sira dezloka ona ba estranjeiru hodi kontinua sira nia estudu.
Situasaun ne’e, fó ameasa ba iha atendimentu pasiente iha HNGV no obriga konsellu diretiva HNGV hodi buka solusaun liuhosi halo rekrutamentu espesiál ba professional Saúde iha Munisipiu atu mai ajuda iha HNGV.
“Ita planeia hela atu halo rekrutamentu médiku jerál hamutuk 93 hosi Munisípiu mai filafali HNGV, hodi subtitui médiku jerál ne’ebé foin lalais dezloka ona ba li’ur hala’o sira nia estudu,” nia dehan.
Médiku jerál sira husi Munisípiu hamutuk 93, ema hirak ne’e mai sei koloka ba kada departamentu.
2,427 total views, 3 views today
Bele hare Video Seluk :