DILI (timorpost.com)- Sua Eminénsia Dom Virgílio do Carmo Kardeal da Silva, husu ba lider partidu polítiku (ParPol) no lider Grupu Arte Marsiais (GAM) sira atu kontrola membru sira iha terrenu.
Nia hatete, konflitu oho malu tula malu, estraga sasán komunidade nian impaktu mai husi juventude grupu arte marsiais no militante partidu sira ne’ebé halo kampaña iha terenu.
“Ita haree akontese kada semana juventude husi grupu arte marsiais no militante partidu polítiku sira mak kria konflitu iha sosiedade nia leet, tanba menus kontrolu husi lideransa sira, entaun membru hirak ne’e provoka malu hodi kria konflitu”, nia informa hafoin prezídiu misa ba frater na’in-lima husi kongregasaun CMM iha parókia Bekora, Segunda (15/05).
Nia dehan, problema hirak ne’e mosu liuhusi kampaña provoka malu ikus mai mosu konflitu oho malu no tula malu hodi estraga sasán uma laran komunidade nian.
Tanba ne’e maka husu ba ukun na’in no lider partidu ida-idak kontrolu no fó hanoin ba malu hodi kontrolu membru sira hodi kontribui ba pas no estabilidade iha bairru no sosiedade nia leet.
Ikus liu Dom Virgílio husu ba povu Timor-Leste atu kria pas no estabilidade hodi prepara an ba vota iha loron 21 fulan Maiu, ida ne’e hodi termina destinu tinan liman nia laran.
Maibé, Na’i Lulik ne’e mós husu ba partidu sira, katak bainhira ba ukun tenke tau as interese povu nian, atu nune’e povu bele sente katak ukun an nia benefísiu maka ida ne’e.
Nia hatutan, povu nia hakarak mak dezenvolvimentu ba oin, la’ós hakarak konflitu, tanba ne’e husu ba ukun na’in sira atu kontrolu membru sira labele kria konflitu iha sosiedade nia leet.
5,841 total views, 3 views today
