DILI (timorpost.com)- Partidu Kongresu Nasionál Rekonstrusaun Timorense (CNRT sigla portugés) ho Partidu Demokrátiku (PD), nomeia deputadu Mari Fernanda Lay lidera segundu órgaun soberanu Parlamentu Nasionál ba períodu 2023-2028.
“Desizaun ne’ebé partidu rua CNRT ho PD deside hodi nomeia deputada Fernanda Lay, ida ne’e mak xefia ita ba tinan lima mai”, Vise Xefe Bankada CNRT, Deputadu Patrocínio Fernandes, informa ba jornalista sira iha Parlamentu Nasionál, Kuarta (21/06).
Nia dehan, desizaun husi partidu rua hodi nomeia deputada Fernanda Lay lidera meza Parlamentu Nasionál, signifika garantidu katak lejizlatura daneen sei la’o ho estabilidade.
“Polítikamente deputadu 65 ne’ebé eleitu husi povu mai iha Parlamentu Nasionál, hothotu elejivel ba kna’ar saida de’it mak sira simu iha Parlamentu Nasionál, signifika konfiansa ne’ebé povu fó ba partidu CNRT ho PD, hodi nomeia deputada Fernanda Lay lidera meza Parlamentu Nasionál, ne’e kredivel no loos katak nia mak sei lidera”, nia afirma.
Vise Xefe Bankada CNRT ne’e agradese ba desizaun husi partidu rua nian, nune’e fiar katak deputada Fernanda Lay bele kapasita kapasidade polítika tomak, hodi lori mandatu lejizlatura daneen ho seguru.
Tuir nia, Partidu CNRT ho PD sempre fiar ba desizaun ne’ebé komún, hodi hili ona Deputada Fernanda Lay, nune’e garante katak sei estabiliza interese nasionál.
“Ita husu ba públiku, desizaun ne’ebé meza parlamentu nomeia ona Deputada Fernanda Lay mak lidera meza parlamentu, ida ne’e mak desizaun kredivel no loos nian”, nia subliña.
Xanana-Alkatiri Hasoru Malu
Prezidente Partidu CNRT, Kay Rala Xanana Gusmão ho Sekretáriu Jerál Partidu FRETILIN Mari Alkatiri, hasoru malu iha Parlamentu Nasionál, atu partisipa iha abertura primeiru sesaun lejizlatura daneen.
“Ita konvida hotu sira, tanba sira-nia naran tama iha lista ne’ebé tribunal notifika ona, nune’e ita konsidera sira mai partisipa nu’udar mandatu ba lejizlatura-VI”, Adjuntu Sekretáriu Jerál Parlamentu Nasionál, João Rui Amaral, informa ba jornalista sira iha PN, Kuarta (21/06).
Nia dehan, iha reuniaun dahuluk lejizlatura-VI nian, Parlamentu Nasionál konvida hotu lider rezisténsia sira hanesan Xanana Gusmão, Mari Alkatiri, Taur Matan Ruak, Lere Anan Timur no Francisco Lú Olo, atu bele marka prezensa, tanba sira-nia naran tama iha deputadu lejizlatura-VI nian, ne’ebé mak Tribunal Rekursu fó sai tiha ona.
“Ita la’ós konvida de’it lider rezisténsia sira, maibé deputadu eleitu no re-eleitu sira ita konvida hotu”, nia afirma.
Nia relata, antes ne’e Parlamentu Nasionál halo ona preparasaun atu simu deputadu foun lejizlatura daneen nian, nune’e garante katak buat hothotu sei la’o ho di’ak, pas no estabilidade.
Tuir nia, preparasaun ba kadeira órgaun lejizlatura daneen nian, fahe hotu ona, katak bankada Governu CNRT ho PD iha parte liman karuk, no iha liman loos mak bankada opozisaun sira, hanesan partidu plataforma nian.
Iha fatin hanesan, Vise Xefe Bankada CNRT, Deputadu Patrocínio Fernandes, iha reuniaun plenária dahuluk lejizlatura daneen nian, sertamente Prezidente Partidu CNRT Kay Rala Xanana Gusmão sei marka prezensa.
“Tenke mai tanba iha kandidatura ba lejizlatura daneen, naran tama iha lista númeru primeiru, tanba ne’e ami-nia Prezidente Partidu sei mai tuir reuniaun dahuluk lejizlatura daneen, hodi simu pose, oinsá haree fali ba segmentu sira tuir mai”, nia informa.
Kandidatu Ideal
Sekretáriu Jerál Partidu Demokrátiku (PD), António da Conceição KALOHAN, subliña, nia parte envolve iha desizaun propoin kandidatu Prezidente Parlamentu Nasionál períodu 2023-2028.
KALOHAN hatete, tetu sira hotu halo husi PD ho CNRT hanesan forsa boot ida ne’ebé propoin deputada Maria Fernanda Lay ba lidera órgaun soberanu daruak Parlamentu Nasionál.
“Ideal mak ne’e ona, ne’e desizaun koligasaun nian,” KALOHAN subliña ba Timor Post via telefone, Kuarta (21/06/2023).
Nia hatutan, kona-ba kompozisaun estrutura meza Parlamentu Nasionál, partidu rua koligasaun sei aprezenta ba públiku hafoin reuniaun dahuluk lejizlatura daneen ne’ebé sei akontese iha loron Kinta (22/06/2023).
Liga ho previzaun públiku sira antes katak KALOHAN mós nu’udar ema potensiál b assume pasta Prezidente Parlamentu Nasionál, KALOHAN ho diplomasia subliña PD nia prinsípiu klaru katak ba Estadu la presiza ho kargu boot.
“Pur enkuantu Ministru mós ha’u la dun hatene, maibé ba Estadu ha’u hanesan deputadu de’it,” KALOHAN salienta.
Nia hatutan tan, kona-ba kargu iha governu mós ba nia atu ba assume tuir nia kapasidade.
“Ha’u ba ida ne’ebé mak ha’u bele halo buat ida. Sé ha’u labele halo buat ruma, ha’u nafatin de’it deputadu. Tanba ida ne’e maka povu fó tiha ona ba ha’u,” lider moderadu jerasaun foun ne’e subliña.
Entretantu, Fernanda Lay nu’udar deputada CNRT dezde 2007 to’o agora naran iha lista deputadu númeru daneen.
Iha Parlamentu Nasionál, durante ne’e Fernanda Lay konsege assume pozisaun sira iha komisaun parlamentár no koñesidu liu hanesan pesoa ne’ebé krítiku no domina iha matéria ekonomia no finansas Orsamentu Jerál Estadu.
Feto Potensiál hosi Partidu CNRT ne’e, moris iha Postu Administrativu Baguia, Munisípiu Baukau iha loron 10 Novembru 1944.
2,652 total views, 3 views today
Bele hare Video Seluk :
Subscribe to Timorpost
