MANUFAHI-Autoridade Suku iha Postu administrativu Turiskai tau esperansa boot ba iha IX Governu atu responde halerik sira hosi baze.
Xefe suku Orana, Adelino da Silva hateten, nu’udar autoridade suku hakarak reforsa pedidu verbal ne’ebé sempre hato’o ba membru Governu sira bainhira vizita ba suku, postu no munisípiu iha oitavu governu.
“Maski governu da-sia sei hein ninia programa kona-ba loron 120 ne’e remata maibé hanesan autoridade nafatin ezije ba governu atu tau prioridade ba estrada Urahou mai Turiskai” dehan Adelino ba Timor post iha Same, Kinta (13/07).
Adelino hameno hanesan autoridade maski mandatu atu remata iha fulan-Novembru sei esforsu atu hatama pedidu ba Ministériu Obras Públiku (MOP) molok loron atus 120.
Suku seluk, xefe suku Matorek, Lucas Vieira Branco husu governu da-sia atu tau atensaun ba dalan Maubisse tama mai proklamadór Francisco Xavier do Amaral nia knua moris fatin.
“Ami husu ba governu da-sia atu hare mós ami nia preokupasaun kona-ba estrada Maubisse mai Turiskai ne’ebé ho kondisaun la dun di’ak” espresa Xefe Suku ne’e.
Kondisaun real, Tuir observasaun nota katak, dalan ligasaun Maubise Turiskai nakonu ho difikuldade fatuk laran tatidik, bainhira transporta pasajeiru nune’e mós ambulánsia transporta pasiente liuliu inan isin rua ba hospital referal Maubisse sai preokupasaun boot.
Antes ne’e estrada ligasaun Urahou, postu administrativu Maubisse, munisípiu Ainaru mai postu administrativu Turiskai, to’o postu administrativu Alas munisípiu Manufahi hetan ona levantamentu husi kompañia iha governu da-ualu maibé to’o oras ne’e seidauk realiza.
1,197 total views, 6 views today
Bele hare Video Seluk :
Subscribe to Timorpost
