MANUFAHI, (timorpost.com)– Komunidade iha suku Beremana, postu administrativu Turiskai, munisípiu Manufahi kontinua halerik ba bee no estrada tanba tinan barak ona seidauk asesu ba bee-moos no Estrada
Xefe suku Beremana, Orlando Soares, hatete hahú husi Governu dahuluk to’o mai Governu Konstitusionál da-IX pelumenus estabelese ona buat balun iha postu administrativu Turiskai, maibé situasaun ne’ebé komunidade suku Beremana kontinua infrenta mak problema infraestrutura báziku hanesan estrada, bee-moos no eletrisidade.
“Liga ba bee-moos kuaze komunidade iha suku Bermana la asesa tanba ami hela iha foho-leten bee iha kraik entaun ami labele asesu ba bee-moos, iha komunidade balun asesu bee-moos ne’e tanba sira fura rasik bee-moos, maibé na realidade komunidade barak mak la asesu ba bee”, Xefe suku Beremana, Orlando Soares, informa ba Timor Post iha eskola IPB, Betanu, Tersa, (13/02), hafoin partisipa iha atividade sosializasaun husi Ministériu Petróliu Rekursu Minarai (MPRM) iha suku refere.
Nia hatutan, “Ha’u hanesan autoridade iha obrigasaun tanba ne’e sempre buka mekanizmu oinsá bee to’o iha xede suku no eskola sira, uluk ita-nia PNDS instala bee-moos iha Beremana, no hetan inaugurasaun husi Ministru maibé la kleur bomba bee ne’e aat entaun la funsiona ona, ne’ebé ita halo ona levantamentu no ekipa ba haree hela mais banhira mak atu adi’a ne’e ita hein de’it”.
Xefe suku ne’e hatete, estrada husi Maubise ba Turiskai daudauk ne’e problema hela, Governu tau ona iha planu maibé nu’udar autoridade lokál seidauk hatene bainhira mak iha desizaun hodi halo konstrusaun. Kona-ba eletrisidade kuaze iha asesu hotu ona maibé aldeia ida mak seidauk, hanesan fatin ida uluk Eis Priméiru Ministru Taur Matan Ruak nia subar fatin, mais halo levantamentu ona, maibé seidauk hatene bainhira mak bele dada.
Tanba ne’e, nia husu ba Governu Konstitusionál da-IX atu haree mós problema ne’ebé povu Turiskai infrenta tanba komunidade iha área rurál kuaze barak mak sei halerik ba infraestrutura báziku.(*)
774 total views, 6 views today
Bele hare Video Seluk :
Subscribe to Timorpost
