(Reportajen Korespondente Munisipiu Manufahi, Luis Casmeiro Lopes/Editor Mateus da Cruz)
MANUFAHI—Ta’a malu entre komunidade iha suku Lesuata, postu administrativu Turiskai, Munisípiu Manufahi, ohin tuku 3 madrugada, rezulta na’in ida mate fatin no tolu kanek todan, Vitima sira lori ona ba Hospital.
Xefe suku Lesuata, Joaquim da Costa, informa, kronolojia hosi akontesementu ne’e tanba parte família vítima la simu hahalok aman viola ninia oan rasik to’o hetan tan oan.
“Ta’a malu ne’e akontese tanba aman viola nia oan feto, kazu ne’e akontese iha tinan kotuk, família ba hato’o ona iha polisia maibé seidauk iha rezultadu, nune’e Labarik feto ninian avo ho tiun hosi Aldeia Titulawai, Suku Liu Rai atu ba ko’alia kona-ba problema refere iha suku Lesuata maibé sira deskuti malu hodi rezulta to’o ta’a malu,”nia dehan via telefone, tersa ne’e.
Akontesementu ne’e rezulta labarik feto ninia aman ho avo kanek no ninia avo ida hosi Suku Liurai mate fatin. Vitima sira ne’ebé hetan taa maioria pertense ba labarik feto ninian família.
Iha tempu hanesan, Xefe Suku Liurai, postu administrativu Turiskai, Gaspar de Araújo, hatete, nia parte la hatene na’in hira maka kanek iha akontesemetu ne’e, maibé tuir nia hatene vítima ne’ebé mate lori ona ba Titulawai.
“Katuas ida mate ne’e agora familia lori ona ba aldeia Titulawai no la hatene hirak mak kanek iha akontesementu ne’e Katuas ne’e ho naran kompletu Juliao Godinho hosi aldeia Fohonaru, suku Liurai, postu administrativu Turiskai,” nia haktuir.
Tuir informasaun ne’ebé Timor Post rekolla hosi terrenu katak oras ne’e daudaun polísia ho ekipa saúde tun ona ba fatin akontesementu hodi evakua matebian no vítima na’in tolu ne’ebé hetan kanek todan ba iha postu Saúde Turiskai.(Lee notisia seluk iha Timor Post/Asesu You Tube Timor post)
1,097 total views, 3 views today
Bele hare Video Seluk :
Subscribe to Timorpost
