Turiskai (timorpost.com)—Postu Saúde Turiskai Munisípiu Manufahi rejista moras Infesaun Vias Respiratóriu Aguda (ISPA) hamutuk 3000, durante fulan-Ualu, hahú Janeiru to’o Agostu tinan ne’e.
“Hahú fulan Janeiru mai to’o Agostu ami rejista pasiente moras Ispa hamutuk 3000 maioria labarik no ema boot la dun. Ami mós rejista moras seluk maibé moras seluk sira iha ne’e ami haree númeru kazu ladún,” kestaun ne’e hato’o husi xefe Sentru Saúde Turiskai Munisípiu Manufahi, Joao Martins Verdial, ba jornalista sira iha Sentru Saúde Turiskai, Kinta (31/08).
Nia dehan, moras ISPA rejista ho númeru a’as tanba kauza hosi klima rai malirin, hemu bee matak no rai rahun tanba dala barak abitante sira lakohi uza máskara nune’e fó impaktu ba saúde.
Enkuantu pasiente hirak ne’ebé afeta ba moras ISPA mai husi suku 11 ne’ebé hola parte iha postu tolu hanesan, Postu Liurai, Foholau, Aitemua.
Xefe dehan, durante ne’e pesoál saúde halo atende ba pasiente sira kona ba programa saúde família, vizita atendimentu rotina, Programa Servisu Integradu Saúde Komunitária (SISCA) ba komunidade sira iha Aldeia, Suku, kada fulan ida dala ida .
Daudaun ne’e, Postu Saúde Turiskai enfrenta menus estoke ai-moruk hanesan antibiótiku metronidazole tablet laiha, cloxacillin estoke limitadu, antisteroid kompostu hosi predniso tablet estoke limitadu no antianalgetik kompostu hosi diclofenac laiha, ibuprofen laiha no parcetamol estoke limitadu.
Joao esplika, daudaun ne’e sira iha planu barak maibé, sira sei menus hela ekipamentu esensiál hanesan teste AB, atu hatene pasiente nia ran ne’e anónimu ou lae, no mós ekipamentu ema partu, dezastre emerjénsia ruma atu suku sei menus.
“Ita iha transporte multi funsaun ida no motorizada 11 maibé, motorizada 9 maka ho kondisaun at hotu entaun difikulta ba servisu hodi atende urjente ba pasiente sira”. Nia haktuir.
Nia dehan, transporte multi funsaun ne’e mós iha kondisaun at ho nune’e difikulta tebes atu atende ba pasiente liu-liu inan isin rua sira atu partu iha sentru saúde.
Problema hirak ne’ebé sentru no postu saúde sira hasoru durante ne’e sira halo pedidu ba iha Saúde munisípiu maibé responde tarde.
Agora daudauk pesoál saúde ne’ebé ativu iha sentru no postu saúde Turiskai enfermeiru na’in-9, parteira 26 hamutuk 37.
Iha fatin hanesan, pasiente Maria Reis da Silva haktuir, sira mai halo tratamentu iha sentru refere hodi konsulta sira nia moras doutora sira atende sira ho oin midar ho di’ak hodi konsulta.
“Pesoál Saúde sira atende ami di’ak hodi trata ami nia moras no fó ai moruk tuir moras ne’ebé ami afeta “, nia hakotu
1,239 total views, 6 views today
Bele hare Video Seluk :
Subscribe to Timorpost
