Dili(timorpost.com)—Atu partisipa iha Eleisaun Parlamentár (ElPar), iha loron21 fulan Maiu ne’e, sidadaun Atoni Oan sira ba toba iha portu Dili hodi hein Ro ne’ebé mak governu promete hodi transporta sidadaun eleitores sira ba tuir votasaun iha Oekusi no Ataúru.
“Situasaun daudauk ne’e tanba laiha responsabilidade hosi governu , tanba saída mak sidadaun sira mak buka dalan sosa rasik billete hodi ba tuir eleisaun, promete ne’e iha ne’ebé”, Mateus Lopo, informa ba Timor Post iha Portu Dili, Sesta(19/05/2023).
Nia dehan, nia moos la-mentavel tebe-tebes ho governu nia tratamentu, tanba saída, governu fasilita de’it transporte ba munisípiu 12 hanesan Lautem, Vikeke ,Baukau, Manatutu, Aileu, Ainaru, Covalima, Manufahi, Ermera, Bobonaru, Likisá no Bobonaru, maibé komunidade RAEOA no Ataúru lae.
“Ida-ne’e, ha’u sente soke loos ha’u fuan, tanba governu halo deskriminasaun no mal tratamentu ba nia povu rasik, ita ko’alia iha palku polítika dehan Kore povu kiak, Mukit, terus no selu-seluk tan, maibé buat ki’ik-oan ida-ne’e ita difisil rezolve, poior liu tan governu rasik lakon nia papél tuir artigu 6 konstituisaun RDTL, ne’ebé estadu tenke valoriza ema hotu nia direitu, iha tratamentu oioin tantu saúde, edukasaun , balansun ba oportunidade no seluk tan.
Nia lamenta mós parte administrasaun Ró success, mezmu ke Ró kompañia privadu, maibé nia kestiona tanba daudauk ne’e halo terus ema, sekarik fan billete tenke informa didi’ak ba pasajeiru sira, labele naran anunsia atu mai hein iha pontikais kastigu-an ema la han, ema hamlaha iha Portu ne’e, tanba mai dadeer to’o fali kalan, ida ne’e hanoin laiha justisa mak ida-nee. Fó sai info ba pasajeiru sira labele matan naklosu de’it ba osan.
“Aat liu tan agora besik eleisaun imi kesi lia ho partidu sira atu depois imi hetan osan imi halo terus povu iha loron ne’e ema kesi kabun la han, inan isin rua sira haterus-an iha ne’e, oan nurak sira tanis iha ne’e. ha’u hanoin ita hapara ona terus iha tempu pasadu mai ukun-an ona, ita goza ona Independénsia”, nia dehan.
Iha fatin hanesan, estudante Antonio afirma relasiona ho ElPar ne’ebé mak sei monu iha Domingu, loron 21 fulan Maiu tinan ne’e, maioria populasaun ne’ebé mak servisu no hala’o estudu inklui balun hala’o vida negósiu iha Kapitál Dili sempre fila ba ida-idak ninia munisípiu orijen inklui RAEOA hodi ezerse ida-idak ninia direitu.
“Infelizmente ita fila ba Munisípiu orijen ho kontente, maibé nu’udar Atoni oan sira sempre enfrenta problema transporte, hanesan ita hotu hatene Transporte RAEOA tenke liuhosi Tasi, enkuantu ita iha Ro tolu hodi bele tula populasaun sira, maibé kuandu besik festa demokrasia Ro balun la halai, nune’e hamosu triste Boot”, Anton akresenta.
Nia haktuir, sira la’ós foin mak ida ne’e, beibeik ona sira mai iha ne’e tuku haat hodi hein Ro nune’e bele hala’o viajen, maibé to’o agora tuku sia ona mós ami sei hein Ro. Ho ida ne’e sente triste tebes ho situasaun ida ne’e.
Tanba ne’e sujere ba Governu buka meius oinsá hodi bele fasilita transporte ho dignu hanesan mós munisípiu sira seluk.
Enkuantu tuir Observasaun Timor Post nota iha terrenu katak sidadaun Atoni oan sira, ohin mai iha Pontikais hahú iha oras tuku 4:00 loraik, maibé agora daudauk ró seidauk mai to’o Portu Dili, ne’ebé mak halo operasaun hosi Oekusi.
Nune’e tuir informasaun katak Ro Sucess atu tula Atoni oan sira iha oras tuku 11:00.
3,894 total views, 3 views today
Bele hare Video Seluk :
Subscribe to Timorpost
