DILIn(TimorPost.com)—Prezidente Repúblika (PR) Jose Ramos Horta, hala’ o enkontru ho nia omólogu hosi Uniaun Emiradu Árabe (UEA), Liurai Sheik Mohamed, iha nia rezidénsia ofisial Qasr Al Shati iha sidade Abu Dhabi hodi diskute kona-ba area kooperasaun ekonomia no diplomata.
‘’Timor-Leste iha relasaun amizade kleur ona ho UEA, maibé seidauk iha akordu ofisiál ho Timor-Leste. Agora mak ha’u komesa buka loke odamatan sira-nian atu aumenta kooperasaun ho Timor-Leste,’’ Xefe Estadu Ramos Horta esplika hafoin enkontru ho Xefe Estadu UEA, Sesta (13/10).
Area pertinente sira ne’ebé Timor Leste hakarak halo kooperasaun bilaterál ho UEA, tuir Prezidente Horta, mak investimentu iha setór ekonomia no haforsa kooperasaun diplomata.
‘’Timor presiza iha infraestrutura otélaria ho standard fitun lima, tanba ita atu tama ASEAN, sei simu bainaka lubuk ida, no hala’o reuniaun oin-oin inklui sentru konvensaun, tanba ne’e investimentu ne’e importante,’’ Xefe Estadu Subliña.
Xefe estadu hatete, ba UEA Infraestrutura hirak ne’e UEA prontu atu investe ho modalidade maneira investimentu tolu, UEA oferese de’it ou fó empresta osan ba Timor no ikus liu halo investimentu públiku privadu.
Aleinde investimentu, iha mós area infraestrutura, UEA mós aprezenta nia kompromisu atu apoiu iha enerjia renovável hodi ajuda minimiza kustu operasionál iha eletrifikasaun atuál.
Prezidente Repúblika Ramos Horta, mós aprezenta nia pedidu kona-ba harii rezidénsia Estudante Universitária hodi fasilita estudante sira hosi munisípiu mai eskola iha kapitál Dili, tanba konsidera uma aluga ga kos, kuaze iha kondisaun mínimu.
Aprezentasaun ne’e, hetan apresiasaun no konkordánsia hosi Prezidente UEA, Sheik Mohamed bin Zayet Al Nahyan no tempu badak Estadu Timor Leste sei identifika rai no sei formaliza hodi realiza planu hirak ne’e, dehan PR Ramos Horta.
‘’UEA mós bele halo investimentu iha area pekuária liu-liu hakiak rusa hosi esporta, inklui ko’alia kona-ba dezenvolvimentu iha area agrikultura,’’ Prezidente Horta afirma.
Prezidente Horta hatán kona-bá kritériu sira ne’ebé UEA hakarak bainhira realiza investimentu iha Timor Leste, katak investimentu hotu-hotu presiza kondisaun, liu-liu lei ba protesaun ba investimentu ne’ebé nasaun barak adapta no dupla atributasaun no tribunal arbitrajen.
Importante ba Timor-Leste atu dada investor hosi rai seluk, mak estatutu rai, mézmu iha difikuldade maibé Prezidente Repúblika konsidera empregu importante.
Ikus liu, Prezidente Repúblika Ramos Horta, relata mós prosesu estabelesimentu embaixada foun iha Dubai (UEA) ne’ebé oras ne’e daudaun Primeiru-Ministru Kay Rala Xanana Gusmão, fó kompeténsia tomak ba Ministru Negósiu Estranjeiru Timor-Leste hamutuk ho Prezidénsia Repúblika hodi formaliza estabelesimentu embaixada nian.
1,095 total views, 3 views today
Bele hare Video Seluk :
Subscribe to Timorpost
