DILI (timorpost.com) – Autoridade Munisípiu Dili (AMD) liuhusi servisu água no saneamentu fornese ona farda, sapatu, botas no luvas ba pesoál saneamentu hodi fasilita sira nia servisu iha terenu.
“Ami fornese fasilidade kalsa, faru, kamizola, sapatu, meas, luvas no botas ba pesoál saneamentu hamutuk 172, maibé ema ida hetan farda rua hodi fasilita sira nia servisu dasa rai no hamoos baleta kuak atu asegura ba sira nia saúde,” diretór servisu água no saneamentu munisípiu Dili, Hermínio Moniz Ribeiro, hateten ba Timor Post iha salaun AMD Matadouru, Segunda (08/05).
Nia haktuir, objetivu husi distribui farda hirak ne’e hodi ajuda no fasilita funsionáriu pesoál saneamentu sira uza atu halo servisu limpeza iha terenu ho dignu hodi bele asegura sira nia saúde.
Tuir diretór ne’e, servisu saneamentu ne’e presiza duni ekipamentu no fasilidade ne’ebé mak adekuadu hodi bele fasilita sira atu hala’o servisu ra’ut fo’er iha sidade Dili.
Tanba pesoál saneamentu hirak ne’e dasa fo’er iha estrada públiku rai rahun suar no loron manas, entaun presiza ekipamentu farda, xapeu luvas no botas hodi fasilita sira nia servisu atu asegura ba sira nia saúde.
Iha sorin seluk, Prezidente Autoridade Munisípiu Dili, Guilhermina Filomena Ribeiro, rekoñese durante ne’e pesoál saneamentu uza farda tinan hirak ba kotuk, farda balun aat ona no farda balun naklees, entaun públiku no membru parlamentár sira sempre kestiona katak servisu saneamentu munisípiu laiha ekipamentu hodi fasilita pesoál saneamentu sira.
Nia esplika, sira nia servisu iha terenu, dala barak públiku la hatene pesoál saneamentu mak ne’ebé, tanba pesoál saneamentu laiha farda entaun susar atu identifika.
“Tanba ne’e mak ami sosa ekipamentu hirak ne’e hodi fasilita pesoál servisu saneamentu munisípiu Dili nian hodi uza hala’o servisu iha baze,” nia hatutan.
Enkuantu, orsamentu ne’ebé mak sosa farda sira ne’e mai hosi Orsamentu Jerál Estadu tinan 2022 nian ho montante rihun 80 hodi fornese ba pesoál saneamentu sira.
Portantu, total funsionáriu ne’ebé servisu saneamentu munisípiu Dili hamutuk 198, maibé fahe uluk farda ba ema na’in-172, depois hein fali faze daruak nian mak distribui fali farda ba pesoál saneamentu sira seluk ne’ebé seidauk hetan.
Iha fatin hanesan, pesoál saneamentu munisípiu Dili, Marçal de Jesus Soares, hatete nia parte apresia no agradese ba Autoridade Munisípiu Dili, tanba fornese ona farda, kalsa, sapatu, kamiza, xapeu no luvas ba sira hodi servisu dasa fo’er iha sidade Dili.
“Ami agradese tebes ba prezidente no ekipa tomak nia esforsu hodi sosa farda foun fó mai ami uza hodi halo servisu limpeza dasa rai ra’ut fo’er iha dalan públiku depois lori ba lixu Tibar hodi sunu atu nune’e bele redús lixu iha kapitál Dili,” nia hateten.
Aleinde ne’e, nia preokupa mós ba sira nia saláriu ne’ebé mínimu tebes, tanba ne’e susar atu bele responde ba nesesidade família nian, tanba labarik barak eskola hotu entaun ho saláriu los.
978 total views, 6 views today
Bele hare Video Seluk :
Subscribe to Timorpost
