(Reportájen Olga Soares/Editor Suzana Cardoso)
DILI (Timor Post) – Rezultadu teste swab hosi Laboratórium Nasionál Saúde (Labnas) ba familía nain tolu hosi matebian Armindo Borges, iha de’it ema nain ida mak pozitivu. No nain rua seluk negativu. Maibé pasiente pozitivu COVID-19 ekipa konjunta saúde seidauk foti husi uma lori ba izolamentu.
“Matebian Armindo Borges nia familía nai’in tolu horsehik, ekipa saúde foti ona swab. Hosi nain tolu ne’e iha metabian nia kaben mak pozitivu. Maibé oan feto ho nia primu rezultadu negativu,” informa fontes husi ekipa pillar III iha Ministériu Saúde (MS) ba Timor Post iha MS Kaikoli, Dili, Segunda (19/04/2021).
Fontes ne’e hatutan, nia ekipa sira sei lori rezultadu ba hato’o ba familía. No familía tenke ho fuan boot simu, aumézmu tempu koopera ho parte saúde. “Ita nia ekipa seidauk tuun ba iha familía nia uma, ita sei tuun ba foti pozitivu ne’e lori ba asegura iha izolamentu,” nia informa.
Iha sorin seluk Adjunta Koordenadora Sentru Integradu Jestaun Krize (SIJK), Odete da Silva Viegas hateten, nia parte simu ona informasuan husi pillar III iha MS katak rezultadu teste amostra ba familía matebian Armindo Borges sai ona no sira nain tolu iha nain ida mak pozitivu .
“Maibé ha’u labele fó sai dadus agora. Orsda liu hosi zoom komferensia imprensa mak Koordenador Dr. Rui Araújo anunsia informasuan sira ne’e, karik familía ida rua negativu no ita fó sai sira hanesan rekopera. Maibé sira ne’ebé pozitivu ami husu nafatin atu bele koopera hodi bele lori ba izolamentu sira,” dehan Odete.
Ekipa sei tuun fila fali ba tereinu hodi informa ba familía katak hasai amostra rezultadu mak ne’e, ida ne’ebé mak negativu, konsidera hanesan rekuperadu ona.
“Maibé ha’u husu ba kolega sira ne’ebé durante loron tolu konsentra iha Vera Cruz husu atu voluntáriu ba swab, atu nune’e karik virus iha ema nia isin fasil deteta no bele izola, iha kualker fatin. Auto izolamentu mós iha izolamentu mós iha. Maibé auto izolamentu ne’ebé iha ekipa sei tuun ba hare fatin priense kondisoens ka lae. Se la priense kondisoens labele auto izolamentu,” husu Odete.
Nia hateten, esplika auto izolamentu signifika iha uma ema moras laiha. Uma refere tenke kompleta haris fatin dapur iha hotu laran.
“Dala ida tan ha’u husu ba familía matebian, katak imformasuan ne’ebé ita nia maun boot hato’o ba familía katak atu koopera, tenke kopera. Ha’u rasik mós koa’lia ho familía katak depois halot tiha mate isin husu ba alin feto no maun sira atu bele koopera inklui mós familía hela besik. Ha’u hatete ba sira ona katak hakarak ka lakohi virus ne’e iha. Tanba ema agora moras barak iha mundu tanba virus ne’e rasik,” tenik Odete.
Tanba tuir nia katak momentu ne’ebá familía matebian rasik mós konkorda katak depois sira halot tiha mate isin sira sei koopera. Maibé saida mak akontese iha tereinu horseik la hanesan saida mak sira promote. Hahalok hirak ne’e la mentavel tebes, mas ita mós tenke kompriende katak sira iha situasaun ida lakon sira nia familía. Maibé ema ne’ebé mate hotu ona, presiza mak ema hotu nia orasaun, no ema sira ne’ebé sei moris preokupa mak nia moris.
“Ha’u rona imformasuan hosi ekipa iha tereinu katak familía hasai liafuan ba ekipa ladun étika, ba Profisionais saúde sira mós sente ofendidu ba liafuan ne’ebé sira rasik hasai, maibé prontu situasaun mak ida ne’e, ami husu familía nafatin atu koopera, tanba matebian nia familía barak halai lakohi swab,” Odete subliña.(Lee Notisia Kompletu Iha Jornál Timor Post)
707 total views, 3 views today
Bele hare Video Seluk :
Subscribe to Timorpost
