DILI, (timorpost.com) – Deputadu sira iha Parlamentu Nasionál (PN) preokupa númeru kazu moras (HIV-SIDA ne’ebé daudauk ne’e aumena maka’as, maibé proposta Orsamentu Jerál Estadu (OJE) tinan fiskál 2023 nian ba Institutu Nasionál Kombate HIV-SIDA Institutu Públiku (INKSTL.IP) ki’ik tebes.
“Ita hatene númeru kazu afetadu HIV-SIDA agora aumentu maka’as, tuir dadus ne’ebé sira hato’o katak mais 2000 ema mak agora fetadu, ne’e presiza fó atensaun. Orsamentu ida ke ki’ikoan tebes, see ita haree ida-ne’e hanesan problema Estadu ita tenke tau osan ida ke boot, tanba ida-ne’e afeta ba ema nia vida, kuandu ema barak maka afetadu ho moras ida-ne’e”, Deputada, Maria Angelina Sarmento, hato’o liuhosi debate espesialidade ba OJE 2024 nian iha (PN), Tersa, (19/12).
Deputadu husi bankada PLP ne’e afirma, papél INKSTL mak atu halo desiminasaun informasaun ba komunidade sira atu kumpriende didi’ak problema HIV-SIDA ne’ebé daudauk ne’e sai problema Estadu nian, maibé orsamentu ki’ik susar atu bele rezolve problema sosiál ne’e.
Maske nune’e, deputada ne’e husu atu fó kontinuidade ho seriedade, liuliu INKSTL tenke halo programa ida loloos no di’ak atu nune’e bele prevene moras HIV-SIDA iha Timor-Leste.
Nune’e mós deputada, Maria Tereza Gusmão, husi bankada CNRT, husu ba jestór INKSTL atu halo servisu maka’as hodi tau atensaun ba maluk timoroan ne’ebé afetadu moras HIV-SIDA atu nune’e labele hada’et fali ba ema seluk, liuliu inan isin rua sira atu labele hada’et ba ninia jerasaun.
“Kestaun ne’ebé sai ha’u-nia preokupasaun mak asuntu HIV-SIDA, liuliu afeta ba inan isin rua, ne’ebé tuir dadus maka’as tebes afeta ba HIV-SIDA, tanba ne’e husu ba Ministériu Saúde ho INKSTL para tau atensaun maka’as ba inan isin rua ne’ebé afeta ona HIV-SIDA, see lae ita hamoris de’it jerasaun sira ne’ebé ke laiha kondisaun ne’ebé di’ak”, deputada ne’e hatete.
Hatan ba preokupasaun hirak ne’e, Primeiru Ministru interinu, Mariano Asanami Sabino, hatete Governu haree husi dadus afetadu sira sa’e maka’as iha rai-laran, feto 645 afetadu no mane 1.357 afetadu ba moras, ne’e maka tenke tau osan para atu bele fasilita servisu INKSTL nian.
“Ha’u hanoin to’o agora ita iha ema afetadu ne’e feto 645, no mane 1.357 ne’ebé afetadu moras HIV-SIDA, tanba n’e tau orsamentu ne’ebé ita aloka ne’e barak liu agora halai liu ba kampaña prevensaun no mós dezaminasaun informasaun, ida-ne’e mak INKSTL halo”, PM Interinu Mariano Assanami, resposta.
Asanami hatutan “Parte saéde mak halo kurativu nian ba povu sira ne’ebé afeta ba HIV-SIDA iha nasaun ida-ne’e, husu ba komunidade sira tenke halo prevensaun para virus ne’e labele da’et ba ema seluk”.
Xefe Governu interinu husu ba sidadaun sira ne’ebé sente afeitadu tenke hakbesik ba sentru saúde sira hodi halo tratamentu, tanba kurativu ne’e gratuita, maibé sidadaun sira mak tenke hakbesik-an hodi ko’alia sai, nakloke para oinsá halo prevensaun ida ne’ebé di’ak atu labele hada’et ba ema seluk.
Entretantu iha debate espesialidade ba OJE 2024 nian, orsamentu ba INKSTL hetan aprovasaun ho votus afavór 43, kontra 3 no abstensaun 18.
Iha proposta OJE 2024 ba INKSTL ho montante dollar amerikanu rihun $798.212, fahe ba saláriu vensimentu hamutuk $340.600, bens e servisu hamutuk $432.512, transferénsia públika laiha, kapitál minór hamutuk $25.100, transferénsia públika no kapitál dezenvolvimentu laiha.(*)
2,691 total views, 3 views today
Bele hare Video Seluk :
Subscribe to Timorpost
