MANUFAHI, (timorpost.com)— Komunidade suku Betanu, postu administrativu Same, munisípiu Manufahi, durante ne’e halo perfurasaun rasik ba bee tanba maioria laiha instalasaun bee-moos iha suku refere.
Xefe suku Betanu, Filipe de Araújo, hatete komunidade Betanu maioria asesu bee liuhosi perfurasaun rasik. Kona-ba eletrisidade maoria asesu hotu no estrada mak kondisaun seidauk di’ak.
“Problema sosiál ne’ebé komunidade suku Betanu infrenta mak kona-ba bee-moos. Husi aldeia 7 suku Betanu nian, aldeia Seliasa mak iha ona instalasaun bee-moos husi foho leten tuun mai maibé kuaze aldeia seluk halo de’it prefurasaun rasik mak komunidade uza ba nesesidade loron-loron”, dehan xefe suku Betanu, Filipe de Araújo, iha IPB Betanu, Tersa, (13/02).
Nia hatutan, “Iha ha’u-nia aldeia 7 ne’e asesu hotu ba iha eletrisidade iha bairru foun balun mak sira foin forma família entaun sira seidauk kobre ba eletrisidade, mais kuaze maioria iha suku Betanu ne’e asesu ona eletrisidade, maibé estrada mak atu liga ba iha aldeia sira balun, hanesan ita-nia to’os no natar sira iha aldeia Loro ne’e, ne’e mak ita transporte susar tebes atu asesu ba tanba kondisaun estrada ladi’ak”.
Entretantu suku Betanu iha aldeia 7 mak hanesan, aldeia Seliasa, Bee-Metan, Lalika, Loro, Lewai, Rai-Fusa no aldeia Susarai. Suku ne’e ho totál populasaun hamutuk 7.000 resin ho xefe família iha 1.800 resin.(*)
861 total views, 3 views today
Bele hare Video Seluk :