DILI (timorpost.com) – Ministru Komérsiu Indústria, (MKI), Nino Pereira, hamutuk ho ekipa hala’o inspesaun direta ba atividade negosiu iha merkadu Taibesi. No iha atividade ne’e MKI identifika uma barraka fa’an roupa nian, vendedór balun halo sai fatin kos.
“Sira hetan ona fatin gratuita depois la utiliza, sira fó aluga fila fali fatin refere ba vendedór sira seluk, depois vendedór seluk ne’ebé aluga halo fila fali ba kos, ita bele haree rasik hariis fatin vendedór sira utiliza sai fali kuartu ida, buat sira ne’e ita haree la’o la tuir ona nia dalan,” Nino Pereira hateten ba Jornalista sira iha Merkadu Taibesi, Sesta (04/08).
Nia hatete, merkadu boot iha Timor-Leste mak iha Taibesi. Merkadu ne’e iha ninia jestaun di’ak maibé problema barraka hirak ne’ebé governu halo hodi fasilita atividade negósiu la utiliza tuir regra interna merkadu nian.
Nia konsidera problema ne’e akontese tanba falta kontrolu komunikasaun la la’o, ladún fó atensaun ba fasilidade sira, no ikus mai buat hotu la’o la tuir regra.
Aleinde ne’e, iha inspesaun ne’e, nia mós nota fasilidade hirak hanesan hariis fatin, bee moos ne’ebé mak haree rasik katak iha kondisaun ne’ebé ladi’ak, maibé agradese tanba ekipa BTL.EP nian mai hamutuk haree ona, oinsá mak atu hadi’a no fornese fila fali bee moos ba hariis fatin sira.
Haree ba kondisaun no utilizasaun merkadu ne’ebé desorganizadu, Governante ne’e apela ba jestór merkadu Taibesi ho ekipa atu dezenvolve diálogu ne’ebé permanente ho vendedór sira, atu nune’e vendedór sira tenke kumpre rejimentu interna merkadu nian.
“Ita presiza ko’alia beibeik no enkoraja nafatin vendedór, atu utiliza espasu ne’ebé kloot iha Merkadu Taibesi, maibé tenke utiliza ho di’ak no kuidadu, atu nune’e atividade negósiu ki’ik oan iha fatin refere bele la’o di’ak pelumenus loron ida rua sira bele hetan rendimentu uitoan,” nia hato’o.
Hatán ba kestaun hirak ne’e, Koordenadór Jestaun Merkadu Taibesi, António Manuel de Araújo, kontente no agradese ho membru Governu foun halo ninia observasaun mai merkadu Taibesi, atu hare direta kondisaun fasilidade inklui vendedór sira nia atividade.
“Ha’u fó obrigado hanesan koordenadór jestaun merkadu tenke esplika duni situasaun ne’ebé akontese iha Merkadu ba ita nia Ministru atu bele hare, tanba ita hare númeru negosiante agora daudauk aumenta, ida ne’ebé fan sasán permanente hamutuk 1563, sira la’ós hala’o atividade ho tipu negósiu ida de’it, negósiu tipu oioin,” nia hato’o.
Nia klarifika, merkadu Taibesi, vendedór sira mak utiliza hodi okupa hanesan na’in, maibé ikus mai sira nia negósiu la folin no la hetan rendimentu, sira halo mudansa fatin ba filafali ba maluk negósiu seluk atu halo hala’o negósiu depois la la’o sira uza hodi okupa de’it no sasán sira lori sai ba fa’an iha li’ur.
“Kuandu ita boot sira haree, vendedór sira okupa barraka lori sasán sai mai fa’an iha merkadu li’ur,” nia hakotu.
5,760 total views, 3 views today
Bele hare Video Seluk :
Subscribe to Timorpost
