DILI (TIMORPOST.COM)—Daudaun ne’e negosiante merkadu Taibesi uza fatin estasionamentu hodi fa’an sira nia produtu hanesan modo tahan, ai fuan fresku inklui roupa obralan.
Tuir negosiante Mateus Ximenes de Araújo, informa katak, sira aproveita loron feriadu hodi fa’an sira nia produtu modo tahan, alfase, angriaun, tomate, liis mutin, mean no mós roupa obralan.
“Ami fa’an sasán iha fatin estasionamentu ne’e la’ós loro loron, maibé ami uza loron feriadu funsionáriu sira la servisu kontrolu iha merkadu, entaun ami aproveita hodi fa’an ami nia sasán atu hetan osan hodi bele sustenta ba nesesidade família loro-loron”, Mateus Ximenes, informa ba Timor Post iha Merkadu Taibesi, Sesta (08/12).
Fa’an na’in ne’e rekoñese, fatin estasionamentu ne’e utiliza para karreta ho motorizada hodi rekolla taxa hatama ba kofre estadu, maibé tanba nesesidade uma laran obrigada uza fatin hirak ne’e hodi fa’an produtu atu hetan osan.
Tanba fatin ne’e sai alternativa no fasil atu hetan osan kada loron, maski estadu bandu, maibé tanba nesesidade obrigada uza fatin ne’e hodi fa’an sasán.
“Merkadu Taibesi kada loron aumenta negosiante barak, maibé merkadu la sufisiente hodi akumula negosiante sira hotu, ami husu governu atu kria tan merkadu ki’ik balun iha Dili laran, atu nune’e ami sira ne’ebé seidauk hetan fatin ne’e bele ba fa’an iha ne’ebá”, nia husu.
Iha oras hanesan jornalista Timor Post tenta konfirma xefe departamentu servisu jestaun merkadu munisípiu Dili, Gaspar da Silva, maibé laiha fatin, tanba iha loron feriadu.
Tuir observasaun Diáriu Timor Post oras tuku 10:11 iha fatin refere negosiante ne’ebé fa’an produtu lokál modo tahan, ai fuan fresku no roupa obralan kuaze uza fatin estasionamentu hodi fa’an sira nia produtu maski seguransa merkadu Taibesi bandu fatin refere.
840 total views, 9 views today
Bele hare Video Seluk :
Subscribe to Timorpost
