DILI, (timorpost.com)—Membru Polísia Nasionál Timor-Leste (PNTL) kestiona promosaun deviza ne’ebé Komandu Jerál PNTL fó ba membru sira la justu, tanba iha membru balun hatudu prestasaun servisu di’ak maibé komandu la rekoñese.
Membru PNTL ne’ebé lakohi públika nia naran hahtete, hafoin haree lista promovidu sira iha semana rua ba kotuk, pesoál PNTL lamenta kona-ba lista promosaun ne’ebé fó sai hosi komandu PNTL, tanba tuir sira-nia haree iha membru ne’ebé prestasaun servisu di’ak durante iha nia kareira, maibé la promove, maibé promove fali seluk, tanba ne’e sira konsidera promosaun ba deviza ne’e ladún justu.
“Ami asesu ona lista promosaun deviza ne’e, ami hanesan membru polísia ita ladún sastifas, ha’u bele dehan promosaun ne’e la justu tanba iha ofisiál no sarjentu balun servisu prestadu di’ak la promovidu”, Pesoal PNTL ne’e informa ba Timor Post bainhira dada lia, iha Sábadu, (09/12).
Nia esplika, prestasaun lubuk ida ne’ebé membru PNTL hatudu ba públiku sente maka iha tinan rua tuir-tuir malu, 2022 no 2023, realiza eleisaun prezidensiál ho eleisaun parlamentár, ikus liu eleisaun suku foin lalais ne’e hotu la’o di’ak. Maske iha munisípiu ida rua mosu problema, maibé kuaze munisípiu barak situasaun kontroladu, no prosesu eleisaun sira ne’e to’o konklui hetan rezultadu demokrátiku tebes, tanba hetan seguransa másimu husi membru PNTL.
“Ami atu dehan de’it, eleisaun prezidensiál 2022 no eleisaun parlamentár 2023, i foin lalais ita organiza tan eleisaun suku, ne’e hotu la’o di’ak, maske iha muninsípiu balun problema mais kuaze munisípiu barak laiha problema to’o fó sai rezultadu, ita-nia kontribuisaun hodi fó seguransa”, nia hatete.
Tuir loos Komandu Jerál haree husi prestasaun servisu membru sira destakadu iha munisípiu ne’ebé laiha problema durante tinan rua nia-laran, hodi promove sira-nia deviza.
Enkuantu membru PNTL balu husi munisípiu, hato’o sira-nia deskontente ba lista promosaun deviza, tanba iha membru polísia lubuk ida halo servisu maka’as la promove, maibé promove de’it lista ne’ebé komandu munisípiu sira rekomeda.
“Polísia nia servisu bazeia ba orientasaun komandu, ne’ebé munisípiu sira ne’ebé laiha problema tanba membru polísia kumpri orientasaun komandu nian, entaun presiza promove hotu”, reforsa membru PNTL husi munisípiu.
Aleinde ne’e, Timor Post rekolla informasaun liga promosaun deviza, kuaze membru sira iha munisípiu sira seluk mós tau kestaun ba promosaun deviza ne’e, tanba promosaun fó de’it ema ida rua mak hetan, maibé membru barak maka durante ne’e hatudu prestasaun servisu la promove sira-nia deviza.(*)
804 total views, 3 views today
Bele hare Video Seluk :
Subscribe to Timorpost
