DILI (timorpost.com)- Eleisaun Parlamentár 2023, ne’ebé realiza iha Domingu (21/05), rezultadu hatudu Partidu Kongresu Nasionál Rekonstrusaun Timorense (CNRT), ne’ebé lideradu hosi Kay Rala Xanana Gusmão, manan iha sentru votasaun Balibar, Suku Dare, Postu Administrativu Kristu Rei, Munisípiu Dili.
Hosi rezultadu kontajen ne’ebé hatudu, Partidu CNRT okupa fatin dahuluk ho votu 290, tuir kedas Partidu Frente Revolusionáriu Timor-Leste Independente (FRETILIN) ho votu 49 no Partidu Demokrátiku (PD) ho votu 26.
Alende ne’e, partidu sira balun konsege hetan votu hosi 1 to’o 5, maibé sira seluk la hetan votu iha sentru refere.
Enkuantu partidu ne’ebé kompete iha eleisaun parlamentár 2023, kompostu hosi Partidu PDN, PLPA, PLP, PD, KHUNTO, PVT, UDT, PUDD, PR, UNDERTIM, FRETILIN, CNRT, CASDT, MPLM, PST, PDS, no AMPT.
Antes ne’e, Prezidente Partidu Kongresu Nasionál Rekonstrusaun Timorense (CNRT), Kay Rala Xanana Gusmão, ezerse nia direitu votu iha sentru votasaun Balibar.
Hafoin tuir eleisaun, Xanana uza oportunidade hodi husu ba povu liuliu joven sira atu kria pás no estabilidade iha eleisaun parlamentár ne’e.
Nia hato’o mensajen ba povu nafatin ezerse direitu demokrátiku, tanba ne’e mak temi estadu direitu demokrátiku.
“Ha’u husu mós pás, no estabilidade ba militante no simpatizante CNRT nian, karik ita manan, tanba ha’u hatene ita sei manan, labele halo provokasaun oi-oin,” nia hateten hafoin tuir votasaun iha Sentru Votasaun Balibar, Postu Administrativu Kristu Rei, Domingu (21/05/2023).
Nune’e nia husu mós labele simu provokasaun hanesan foin lalais fila hosi Tasi-Tolu, ema buka provoka para estraga tiha ambiente, tuda karreta, no ema kanek.
“Ida ne’e mak ha’u atu husu ba povu tomak, liuliu ba joven sira hosi partidu seluk ne’ebé gosta provoka ne’e, favor ida ita respeita malu ba, lae ita la temi festa demokrasia,” nia afirma.
Líder Nasionál ne’e esplika, festa demokrasia ema hotu-hotu tenke kontente, hanesan jogu tenke iha manan no lakon.
Ikus nia haktuir, partidu CNRT lakon ona iha 2007, laiha buat ida, no depois sai hosi Governu iha 2020 mós hanesan lá halo provokasaun ida.
1,071 total views, 12 views today
