Dili– Hare ba movimentu ema estranjeiru hirak ne’ebe kontinua aumenta, Servisu Migrasaun esforsu an hodi servisu makas, liu husi operasaun rutina konsenge detekta no halo kapturasaun ba sidadaun estranjeiru nain 2, ne’ebe maka halo falsifikasaun ba dokumentus hosi instituisaun estadu nian hodi hetan lukru.
Diretor Jeral, Servisu Migrasaun, Superintendente Asistente Polisia, Luis Soares Barreto, hateten, sidadaun nain rua ne’e kaptura iha area hudi laran.
“Atu informa deit ita nia membru hosi servisu operasional halo kapturasaun ba sidadaun estranjenjeiru nain rua iha area Hudi Laran, Bairo-Pite, tanba halo falsifikasaun ba dokumentus. Enkuantu iha mane ida ho naran inisial WX tinan 33, no feto ida naran HSJ tinan 33, no sira nain rua hosi Fujian-Xina”, esplika, Luis Barreto, iha nia servisu fatin, Ministeriu Interior, Vila-Verde, kuarta ne’e. (06/07/2022).
Nia dehan, sidadaun nain rua ne’e servisu loke rasik ajensia ida no durante ne’e halo ona falsifikasaun ba dokumentu ofisial nasaun nian ho sira nia karimbu rasik hodi halo vistu servisu no pareser legal nian.
“Sidadaun nain rua ne’e rekuñese sira nia aktu no ita lori mai kedas sede sentral Migrasaun hodi foti identidade no ita entrega ona ba Komandu Munisipiu Dili hodi halo detensaun”, subliña.
Luis esplika, evidensia ne’ebe rekolla maka karimbu 113, kompostu hosi karimbu kompanhia 86, karimbu diretores 21, karimbu Ospital Nasional Guido Valadares 1, no restante husi sira nia ajensia.
“Ita rekolla mos evidensia hirak ne’ebe iha no dokumentus balu, hanesan pasaporte, no Komputador desktop hamutuk 5, laptop 1 no komandante operasaun ho nia membru sira haruka ona Ministeriu Publiku. Ami hein deit Prokurador sira atu hare kazu ne’e ou fo kompetensia ba se mak atu hare kazu ne’e no depois lori ba Tribunal no Tribunal sei desidi bazeia ba lei ne’ebe maka iha”, relata.
Entertantu, Komandante Munisipiu Dili, Superintendente Xefi polisia Henrique da Costa, konfirma, sidadaun nain rua ne’e detein ona iha sala detensaun Komandu Munisipiu Dili.
“Parte Migrasaun konklui ona investigasaun maibe tanba sira laiha sala detensaun entaun sidadaun nain rua ne’e ita detein provizoriu iha ne’e durante oras 72 nia laran, hafoin sei kontinua ba Ministeriu Publiku hodi hare ba parte juridiku nian no halo investigasaun tuir prosesu legal nian”, hakotu Komandante PNTL Dili, Henrique da Costa. (SRP/*)
2,520 total views, 6 views today
Bele hare Video Seluk :
Subscribe to Timorpost
