DILI (timorpost.com) – Kazu agresaun fíziku hasoru menoridade iha Munisípiu Bobonaru, Ministru Interior, António Armindo, deklara simu ona keixa husi família vítima inisiál C.
Nia hatete, relasiona ho kazu agresaun fizíku hasoru menoridade iha Bobonaru ne’e loos, Komandu Jerál PNTL simu ona keixa kona-ba kazu ida.
“Ha’u rasik simu karta husi individu balun ne’ebé haruka direitamente mai iha ha’u-nia gabinete, ita despaxu ona ba Komandu Jerál PNTL para loke investigasaun ba membru PNTL deskonfia ba kazu ida ne’e,” dehan Armindo hafoin partisipa avaliasaun servisu Ministériu Interior nian iha sentru formasaun Polisia, Komoro, Sesta (06/01).
Nia hatutan, maski kazu agresaun fizíku akontese ona no espalla iha media sosiál, tanba ne’e, ema hotu-hotu seidauk hatene loos mak ida ne’ebé no sala mak ida ne’ebé, tanba ne’e Komandu Jerál PNTL tenke hahú halo investigasaun para hatene kondenasaun ne’e loos ka la loos.
“Karta ne’ebé ha’u simu ne’e individu balun, relasaun ho vítima C nia família, ha’u la bele hatete tanba segredu instituisaun nian,” nia hakotu.
Antes ne’e, Komandante Jerál PNTL, Komisáriu Polisia Faustino da Costa, informa kazu Bobonaru ne’ebé akontese iha loron Tersa- Feira kalan (27/12), Polisia Nasionál Timor-Leste (PNTL), liuhusi Departamentu Diresaun Justisa Dixiplina identifika ona membru PNTL Munisipiu Bobonaru ne’ebé momentu ne’ebá halo atuasaun ba joven sira ne’ebé sunu fugetis iha fatin refere.
“Kazu Bobonaru ne’e, ita identifika ona membru ne’ebé momentu ba halo atuasaun ba joven sira ne’ebé sunu fugestis iha area eis rezidénsia Bispu nian, ita identifika ona membru PNTL iha ekipa rua, mais prosesu la’o mak Komandu Jerál PNTL haree,” nia hateten hafoin partisipa tomada de posse Komandante PNTL Munisípiu Dili, iha Kaikoli, Kuarta (04/12).
Nia dehan, kona-ba kazu Bobonaru ne’e, prosesu sei la’o, tanba ekipa Departamentu Diresaun Justisa Dixiplina, mak dezloka ba iha Munisípiu Bobonaru hodi halo investigasaun ba kazu ida ne’e.
“Família husi vítima ho naran inisiál C, to’o agora seidauk mai hato’o keixa ba iha Komandu PNTL Bobonaru, maibé liuhusi media no atravesa husi lider partidu Polítiku sira ne’e barak demais, maibé prosesu la’o mak ita haree,” nia dehan.
1,595 total views, 3 views today
Bele hare Video Seluk :