DILI (timorpost.com) – Asistente Sekretáriu Jerál United Nation (UN), no Prezidente United Nation Development Program (UNDP), husi Asean Pasífiku sei mai vizita Timor-Leste.
“Ohin ha’u mai hasoru Primeiru Ministru ko’alia kona-ba Asistente Sekretáriu Jerál UN nia no Prezidente UNDP Asean Pasífiku nian atu halo ninia vizita mai iha Timor-Leste,” dehan reprezentante Nasionál PNUD/UNDP, Munkhtuya Altagerel, iha Faról, Tersa (20/09).
Nia dehan, objetivu lideransa na’in rua husi UN no UNDP nia vizita mai Timor-Leste ne’e atu hasoru Governu no mós komunidade sira ne’ebé UNDP halo projetu ba.
La’ós ne’e de’it sira-nia vizita ne’e mós sei mai enkontru ho Governu hodi ko’alia pontu importante tolu ne’ebé UNDP servisu ba povu Timor-Leste hanesan, apoiu servisu Governu nian, mudansa klimatika no diversifikasaun ekonómika iha Timor-Leste.
“Asistente Sekretáriu Jerál UN no Prezidente UNDP Asean Pasífiku nia sei mai vizita Timor-Leste ne’e iha loron 17 fulan Outobru tinan ida ne’e, no sei hela iha ne’e durante loron haat nia laran,” deklara nia.
Tanba durante tinan haat kotuk UNDP nia servisu iha Timor-Leste espesiál foin daudaun apoiu Covid-19 no Inundasaun ne’e, tanba husi inundasaun nian UNDP servisu hamutuk ho Governu hodi kria servisu ba komunidade sira, ho osan montante millaun 50 USD.
“Tanba ne’e mak lider na’in rua husi UN no UNDP atu mai Timor-Leste ne’e hodi haree direita ezisténsia UNDP durante tinan 20 resin iha Timor-Leste ne’e, halo ona saida ba povu Timor-Leste ida ne’e,” hateten nia.
1,399 total views, 3 views today
