DILI (timorpost.com) – Kadetes foun FALINTIL-Forsa Defeza Timor-Leste (F-FDTL) na’in-rua rezigna-an, tanba iha difilkuldades.
Xefe Segundu Komisaun Rekrutamentu F-F-FDTL tinan 2022, Tenente Koronel Mario Baptista “Bersama” hatete kadetes na’in-rua rejigna-an ne’e ida husi Munisípiu Lospalos, tanba de’it forma ona uma kain no ida seluk husi Munisípiu Aileio, tanba nia atu ba buka moris iha rai li’ur, tanba ne’e, sira deside hodi rejigna-an
“Ita-nia Kadete Foun F-FDTL sira balun rejigna-an ne’e iha alin feto ida ho naran sonansia husi Munisípiu Lospalos naran sai tiha, depois nia rasik mak deside hodi rezigna an, tanba iha difikuldade, Nune’e mós, mane ida husi Lospalos mós rejignan an, tanba atu ba rai li’ur,” dehan nia ba jornalista sira hafoin remata Konferénsia Imprensa iha Ministériu Defeza Fatuhada, Tersa (20/09).
Nune’e, parte komisaun rekrutamentu deside hodi foti sira rezerva seluk hodi taka fali sira atu nune’e bele kompleta númeru 600 ne’e.
“Tanba, tenke to’o iha 600, tanba ita Governu mós aprova osan ba F-FDTL foun hamutuk 600, nune’e ami komisaun tenke prepara rezerva atu nune’e karik iha kadetes foun sira iha difikuldade ruma hodi troka de’it,” nia dehan.
Alende ne’e nia dehan, horisehik sira parte halo teste ba feto na’in-65 ne’e, hafoin haruka ba iha sentru formasaun treinamentu (CFT) Komadante Nicolau Lobato Metinaru, tanba tauk sira hetan gravida.
“Maibé, horisehik ita halo teste ba sira maibé la ema ida mak hetan gravida, maske sira ba ona nia sentru formasaun Treinamentu Metinaru, maibé tama ba fulan ida sira parte sira halo teste tan, tanba horisehik ema batak entaun lalais de’it,” nia dehan.
Nia dehan, tinan ne’e kadete foun feto hamutuk 65 pesoas, entermu persentajen 11% ba feto.
2,012 total views, 6 views today
