DILI, (timorpost.com)— Primeiru Ministru (PM), Kay Rala Xanana Gusmão, diskuti ho Prezidente Republika José Ramos-Horta, hodi desidi katak Kuarta-feira aban (14/02) sai pontu toleránsia tanba funsionáriu barak mak sei tuir misa hodi simu sinzas.
“Ha’u mai informa mós ba Prezidente Repúblika Kurta-feira loron sinzas, ne’ebé ohin (13/02) diskuti ho Prezidente Repúblika hodi deside katak Kuarta-feira sei toleránsia pontu”, Xefe Governu, Kay Rala Xanana Gusmão, informa ba jornalista sira hafoin enkontru ho Xefe Estadu, José Ramos-Horta, iha Palásiu Prezidensiál Nicolau Lobato, Bairru-Pité, Tersa, (13/02).
Xefe Governu deklara katak maske loron sinzas ne’e ba tau de’it sinzas ne’e fila ona maibé funsionáriu barak mak sei tuir misa tau pontu toleránsia. Kuarta-feira sinzas mak loron ne’ebé sai hanesan odamatan ba tempu kuarezma, ema hotu sei simu sinzas iha selebrasaun eukaristia hodi hatudu katak ita ema hanesan rai-rahun ne’ebé mai husi rai, horik iha rai no sei fila-fali ba rai.
Sinzas mak loke tempu kuarezma hanesan preparasaun ba selebrasaun Paskua nian, nune’e tempu Kuarezma kristaun hotu sei halo peniténsia Jejum no abstinénsia. Jejum ne’e la’os signifika jejum ba ai-han de’it maibé ba lia-fuan aat, hahalok aat sira ne’ebé ita halo iha moris loron-loron.
Aleinde ne’e, Sinzas bolu ita atu reflete hikas fali katak ita moris mai iha mundu la’os mai husi instrumentu ida ou materiál balun maibé ita mai husi rai sei fila-fali ba rai. Tanba ne’e, iha loron ne’e marka sinál krus ho ahi-desan mai ita-nia rentoos hodi hatudu katak ita mai husi rai no sei fila-fali ba rai, Iha Sinzas ne’e mós hanesan loron dahuluk ba tempu Kuarezma nian iha ne’ebé hanorin ita oinsá halo jejum no abstinénsia durante loron 40 hodi prepara no punifika ita-nia-an hodi bele selebra loron boot Paskua.(*)
840 total views, 3 views today
Bele hare Video Seluk :
Subscribe to Timorpost
