Dili (Timor Post) — Prezidente Repúblika (PR), José Ramos Horta, sente kontente tebe-tebes, tanba odamatan boot Palásiu Governu nakloke ba sidadaun Timorense hodi partisipa iha seremónia aniversáriu FALINTIL ba dala-47, iha loron 20 fulan-Agostu 2022.
“Ha’u kontente di’ak liu ita selebra forsa armada FALINTIL nia loron, no loos duni ha’u haree odamatan boot iha palásiu Governu nia oin mós nakloke hela hodi povu mós partisipa,” Xefe Estadu kasu lia hirak ne’e iha ninia diskursu, Sábadu (20/08).
Liga ho aniversáriu FALINTIL nian, Xefe Estadu afirma katak, tanba Forsa Armada ne’e hola parte iha povu, mai husi povu, atu serbí povu, serbí dame, hamriik metin iha povu nia sorin, hatudu respeitu domin ba povu, kuandu povu haree Forsa Armada liu, sira labele ta’uk, sei sira ta’uk, tanba buat ruma sala karik, ida ne’e mós aplika ba Polísia.
“Ha’u hatene de’it tinan sira-nia laran, Forsa Armada halo daudaun ona misaun fízika, maski ki’ik oan, maibé halo daudaun, iha unidade enjenaria no médika,” PR Horta dehan.
Xefe Estadu aumenta, bainhira iha mós posibilidade, depende ba kondisaun ekonomia rai ne’e ninian, no kondisaun ne’ebé tuir programa Forsa Armada nian, bele karik ho di’ak liu tan, atu forsa armada aumenta iha tempu ba Pas, iha kapasidade atu dame, tulun instituisaun estadu ne’ebé iha responsabilidade ba situasaun humanitaria sosiál.
“Iha tempu de Pas, ha’u iha estratéjia ida atu hatete, ha’u hakarak Pas, dame prepara ba asuntu. Ne’e normál, hanesan tema jerál, maibé ha’u hanoin Timor-Leste, laiha ameasa ruma husi li’ur, maski situasaun internasionál dalaruma sai difísil liu tan, ita nunka hatene, maibé buat ida ita la hatene ho konfiansa,” Xefe Estadu relata.
Timor-Leste laiha inimigu, Timor-Leste nia relasaun di’ak teb-tebes husi nasaun viziñu sira hotu-hotu, iha parte súl, Austrália, Nova Zelándia, iha Pasífiku sira, to’o ita-nia viziñu Indonézia, Malázia, Singapura, Tailándia, Brunei, no iha rai seluk-seluk tan.
“Timor-Leste bele orgullu, tanba ita laiha inimigu, ita laiha nein-adversáriu rejionál ou global. Maibé ita prepara nafatin, inklui iha parte enjenaria no médika, ba iha Tempu de Pas, ita,-nia forsa bele ativu liu,” nia hakotu.
5,071 total views, 18 views today
Bele hare Video Seluk :
Subscribe to Timorpost
