DILI, (timorpost.com) — Diretór ezekutivu Forum Organizasaun Naun Governamentál Timor Leste (FONGTIL), Valentim da Costa Pinto, konsidera problema profesór kontratadu ne’e grave, tanba ne’e husu ba Ministra Edukasaun (ME), Dulce de Jesus Soares, tenke rezolve, selae eskola barak sei abandona no bele afeita ba prosesu aprendisajen.
Nia hatutan, problema profesór kontratadu nian ne’e Ministériu Edukasaun tenke kuidadu no trata asuntu ne’e ho di’ak.
“Ita lakohi sira abandona bele afeta ba ita-nia oan sira-nia aula, kestaun ida-ne’e ba ami grave, ne’ebé Ministériu Edukasaun tenke haree didi’ak ho ulun malirin ho problema ne’e, proposta balun Ministériu Edukasaun bele halo, bele halo avaliasaun dezempeñu ba sira-nia servisu, hafoin bele avansa ba mestre foun,” rekomendasaun ne’e hato’o husi Diretór Ezekutivu FONGTIL, Valentim da Costa Pinto, ba Timor Post iha nia kna’ar fatin, Kaikoli, Tersa (16/01).
Nia dehan, banhira solusaun laiha signifika tenke abandona eskola barak iha teritóriu nasionál, inklui eskola barak tenke taka no ita tenke hein to’o fulan barak depois mak hahé fali eskola.
“Ba ami hanoin Ministra Edukasaun tenke kuidadu no haree didi’ak, hodi tuur hamutuk ho sira hodi rezolve dalan ne’ebé di’ak liu, tanba ami mós hetan ona profesór kontratadu sira-nia esteitmentu ne’ebé submete mai ami para atu bele haree kona-ba ida-ne’e,”dehan nia.
FONGTIL rekomendasaun ba Ministra Edukasaun tenke haree ho didi’ak ho kuidadu atu la bele fó afeta ba ita-nia eskola sira, liuliu ba eskola sira ne’ebé iha área remota sira, tanba ne’e afeta maka’as ba labarik sira, bele lakon direitu estudu.
tanba ne’e ME tenke haree ho didi’ak, atu nune’e solusaun ba profesór kontratadu sira labele afeita ba funsionamentu eskola sira, bainhira laiha solusaun mak ba oin eskola barak mak sei abandonadu, tanba profesór permanente iha eskola ne’e másimu ema na’in-2 no na’in-3 de’it, enkuantu iha aula barak, profesór permanente sira labele kobre hotu.
“Ita presiza duni profesór kontratudu sira ne’e, presiza kontinua kontratu sira, hodi halo avaliasaun dezempeñu ba sira ou bele halo mudansa ruma maibé tenke garantia katak eskola sira tenke funsiona ho di’ak, see la’e ba futuru bele problema tanba eskola abandona, labele garante ita-nia oan sira-nia direitu atu hetan edukasaun, presiza Ministra Edukasaun tenke trata asuntu ne’e ho didi’ak no kuidadu, tanba ida-ne’e sira-nia tratamentu ne’e direita ba ema, labele uza demais aproximasaun polítika, tanba ne’e sei afeta maka’as ba funsionamentu eskola sira,”dehan nia
Iha sorin seluk, professora kontratadu ne’ebé hanorin matéria ingles iha Eskola Sekundária Heroia da Pátria Bekora, Amalia Rodrigues Ximenes, hatete, sira sei halo asaun demostrasaun ne’e to’o hetan solusaun.
“Ami kontinua mai nafatin iha Ministériu Edukasaun hodi kontinua ejiji ami-nia direitu hanesan profesór no profesora tanba hapara ami-nia kontratu ne’e laiha baze legál ruma, ida-ne’e ami la simu, ami mós uluk luta ba rai ida-ne’e, labele dehan fali ami laiha direitu, ida-ne’e ami la simu, tanba ami laiha sala ruma,” deha nian.
Profesór kontratadu sira sei kontinua halo manifestasaun iha ME hodi ejiji direitu nu’udar profesór, tanba profesór balun banorin tinan barak ona mak derpenti hapara kontratu, ne’e funsionáriu kontratadu sira bele la simu.(*)
1,369 total views, 3 views today
Bele hare Video Seluk :
Subscribe to Timorpost
