DILI (timorpost.com)—Ekipa avaliasaun Grupu Ázia Pasífiku (APG), ho kompostu husi espesialidade na’in 10 hosi setór oioin, mai halo avaliasaun ba membru konsellu nasionál na’in 15 inklui Banku Sentrál, kona-ba progresu kombate sistema finansiamentu terrorizmu iha TL.
Diretora Unidade Formasaun Finanseira BCTL, Maria José Sarmento, esplika objetivu hosi avaliasaun ne’e, tanba TL iha ona lei anti brankamentu kapitál finansiamentu terrorizmu ne’ebé mak iha vigor dezde 2011.
Bazeia ba lei ida ne’e Governu TL, liuhosi komisaun nasionál ne’ebé lideradu hosi Ministériu Justisa Amândio dé Sa Benevides nu’udar Prezidente Komisaun Nasionál, Ministru Negósiu Estranjeiru no kooperasaun, ho membru 15 inklui BCTL, Ministériu Finansas, Ministériu Interior, Komandu PNTL, PGR, SERVE.IP, Trade invest no membru balun tan.
“TL adere ba grupu Pasífiku, dezde fulan Jullu 2008, tanba ita hanesan membru ba Asia Pasífiku naturalmente ita iha obrigasaun balun ne’ebé mak tenke implementa programa regional sira, programa ida maka hala’o avaliasaun mutual ne’e maka agora ekipa avaliasaun hosi APG, iha ema na’in 10 kompostu hosi sira nia espesialidade oioin husi sektór legál, financial, sira mai halo avaliasaun ba membru konsellu nasionál, kona-ba progresu kombate sistema finansiamentu terrorizmu iha TL,” Maria José Sarmento, hato’o informasaun hirak ne’e hafoin partisipa iha Team Asia Pacific on Money Laundering mutual evaluation of TL, iha MNEK, Tersa (19/09).
Nia informa, ekipa avaliasaun ne’e mai para atu hare nivel kumprimentu TL nian parante rekomendasaun ne’ebé APG hasai ona kona-ba financial Action Task Force, ka Global Money Laundering and terrorist financing, ne’ebé hasai padraun 40 ba país membru sira, iha obrigasaun atu adota ba kuadru jurídiku implementa padraun internasionál sira.
Nia informa, avaliasaun ne’e, tama ona ba segundu, iha primeira avaliasaun halo tiha ona entre tinan 2011 no 2012, iha primeiru avaliasaun ne’e sira hato’o rekomendasaun ba TL atu bele mellora sistema rejime anti brankamentu kapitál ho finansiamentu terrorizmu.
“Agora ba avaliasaun daruak nian ne’e, sira mai atu hare progresu ne’ebé TL halo intermus atu kumpre rekomendasaun padraun internasionál sira ne’e, tanba ne’e mak ohin loron dahuluk ba avaliasaun mutual,” nia hato’o.
Nia informa, avaliasaun ba prosesu ne’e rasik, komesa tiha ona iha fulan Marsu, maibé parte prinsipál ida maka sira tenke mai hare ho matan hodi ko’alia ho autoridade nasionál ida-idak, inklui setór privadu sira, NGO, CCI-TL no banku sira.
“Sira hakarak atu rona diretamente hosi ita ida-idak oinsá ita nia persesaun kona-ba risku brankiamentu kapitál, finansiamentu terrorizmu no mós risku hirak ne’ebé fó orijen ba brankiamentu kapitál ne’e”, nia hato’o.
Tuir nia, TL iha risku ba brankiamentu kapitál, maibé TL hala’o bazeia ba rezultadu hosi primeiru avaliasaun mutual hare katak risku brankiamentu kapitál ne’e iha TL iha, liuliu tanba krime subjasente sira, hanesan krime korrupsaun, fraude tráfiku umanu sira ne’e fó orijen ba brankiamentu kapitál.
“Tuir dadus estatístiku ne’ebé agora ita fornese ba iha ekipa avaliasaun ida ne’e, atu hodi justifika ita nia asaun saida maka autoridade kompetente sira foti hodi halo prevensaun hodi kombate ba risku hirak ne’e”, nia hato’o.
Enkuantu partisipa iha avaliasaun krime brankiamentu kapitál no finansiamentu terrorizmu, iha loron dahuluk ne’e, marka prezensa hosi MJ, MF, BCTL, BNTL, PNTL, PCIC, SERVE.IP, Trade Invest, Inspesaun jerál jogu, no autoridade hirak seluk tan.
660 total views, 9 views today
