MANUFAHI, (timorpost.com)— Xefe suku Betanu, Filipe de Araújo, preokupa tanba iha Sentru Saúde Betanu durante tinan barak pesoál saúde na’in-rua de’it mak hala’o atendimentu ba populasaun 7.000-resin iha suku Betanu Bee-Metan, postu administrativu Same, munisípiu Manufahi.
Xefe suku ne’e hatete, iha suku Betanu iha aldeia 7, mak hanesan aldeia Seliasa, Bee-Metan, Lalika, Loro, Lewai, Rai-Fusa no aldeia Susarai no totál populasaun hamutuk rihun 7 (7.000) resin ho totál xefe família hamutuk 1.800 resin maibé totál pesoál rua de’it mak halo atendimentu ba populasaun sira ne’e.
“Ita-nia pesoál saúde ne’e limitadu tebes, ita iha parteira ida de’it no iha doutora ida ne’ebé mak desloka iha ita-nia sentru saúde ida-ne’e maibé ita-nia komunidade ho númeru boot tebes, dalaruma atu halo atendimentu ne’e susar ba sira halai ba mai”, dehan xefe suku Betanu, Filipe de Araújo, iha IPB Betanu, Tersa, (13/02).
Hanesan autoridade lokál husu ba Governu liuhosi Ministériu Saúde oinsá bele aumenta tan pesoál saúde ba iha suku Betanu nian.
“Ami husu ba Ministériu Saúde atu haree mai iha suku Betanu ba iha postu saúde sira ne’e, tanba ita pesoál saúde sira limitadu tebes atu halo atendimentu ba pasiente sira. Tanba, karik iha urjente ruma mak komunidade iha susar ruma sira-nia fatin doutora laiha tiha, iha ita-nia sentru saúde sira ka postu saúde sira ne’e mamuk ona, entaun labele atende ita-nia komunidade”, nia afirma.
Suku Betanu iha aldeia 7 maibé aldeia 2 mak dook husi sentru saúde tanba iha suku refere sentru saúde rua de’it.
“Ita iha suku Betanu ne’e iha sentru saúde rua, ida iha aldeia Bee-Metan no ida iha aldeia Loro, mais agora ita-nia problema ne’e mak ita-nia komunidade iha aldeia Seliasa ho aldeia Susarai, tanba sira atu ba fasilidade saúde nia ne’e sira tenke ba fali iha postu Alas nian no tenke halai ba to’o Waidaberek ka ba fali postu saúde iha suku Daisua”, nia esplika.
Tanba ne’e, nia husu ba Governu liuliu Ministériu Saúde oinsá bele haree kestaun sira ne’e no bele buka mekanizmu ida para rezolve problema ne’ebé komunidade infrenta.(*)
2,094 total views, 3 views today
Bele hare Video Seluk :