MANUFAHI, (timorpost.com)— Médiku Jerál iha Sentru Saúde Betanu Bee-Metan, Doutora, Dirsia Alberina Dias Ximenes, informa durante ne’e sentru saúde halo atendimentu ba kualker pasiente no deteta katak moras ne’ebé aas ikus-ikus ne’e iha Sentru Saúde Betanu Bee-Metan mak moras dengue ho totál pasiente hamutuk 15.
Aliende ne’e, sentru saúde ne’e mós halo tratamentu ba moras sira seluk hanesan moras fuan, isin-manas, mear no muta, tee-been, tuberkuloze, diabetes, tensaun, inklui halo atendimentu ba inan isin rua sira no seluk tan.
“Durante ne’e ami rejista moras ne’ebé aas liu mak dengue, ami rejista hamutuk 15, moras dengue aas, tanba udan la tuir nia tempu entaun bainhira pasiente sira mai konsulta, ami deteta isin-manas, isin-kulit mean, hafoin ami identifika hanesan suspeita depois halo transferénsia ba iha Sentru Saúde Same, tanba iha ne’e ami laiha laboratóriu hasai raan, depois iha ne’eba sira deteta katak pozitivu dengue entaun sira fó kedas tratamentu hodi fó ai-moruk para konsumu hodi halo prevensaun ba dengue ne’ebé iha”, Doutora, Dirsia Alberina Dias Ximenes, informa ba jornalista sira iha nia servisu fatin Sentru Saúde Betanu Bee-Metan, Segunda, (12/02).
Nia hatutan, husi kazu moras dengue ne’ebé rejista seidauk iha pasiente ida mak lakon vida. Durante ne’e moras dengue la’os de’it kona labarik sira maibé deteta tantu labarik no mós ema-boot.
Aliende moras dengue, sentru saúde ne’e mós rejista moras fuan no tensaun, inklui moras pulmaun ka istomagu mak aas iha klínika refere. Aliende ne’e moras diabete ladún barak no moras tuberkuloze mak maioria barak iha suku Betanu.
“Moras tuberkuloze ne’e banhira ami indtifika ami fó kedas ai-moruk ba sira, maibé dala-barak pasinete barak mak lakohi mai kontinua halo tratamentu ba moras ne’e”, nia haktuir.
Kona-ba pasiente ho moras tuberkuloze ne’ebé Sentru Saúde Betano rejista totál 34, númeru ne’e konta mós ho kazu tinan kotuk nian, pasiente balun konsege hemu hotu ai-moruk programasaun tuberkuloze nian no balun la konsege hemu no balun abadona tiha ai-moruk.(*)
3,063 total views, 3 views today
Bele hare Video Seluk :
Subscribe to Timorpost
