MANUFAHI—Polísia Nasionál Timor-Leste (PNTL) Munisípiu Manufahi kaptura ona la’en kaben husi Rosalina ne’ebé hetan oho no hakoi subar iha toos laran, aldeia Riatu, suku Daisua, postu Same, munisípiu Manufahi.
Polísia kaptura inisiál CB iha Aldeia Fataha, Suku Babulo bainhira ho subar lori telefone ba karrega iha nia biin nia uma.
Komandante PNTL Munisípiu Manufahi, Superintendente Joni Viana das Regras konfirma, membru sira kaptura CB iha loron Sábadu (18/02) maizumenus tuku 21.48 OTL.
Komandante Joni haktuir, kuaze semana rua buka tuir, bainhira membru sira ba kaptura suspeitu kaer hela katana ida atu halo reasaun hasoru maibé ho professional CB hetan kapturasaun.
“Antes ne’e ita fahe ona informasaun ba família oinsá kolabora ho autoridade seguransa ne’e mak horikalan ekipa kompostu husi servisu intelijénsia, eskuadra no forsa rezerva halo kedas kapturasaun,” Komandante Joni haktuir ba Timor Post iha Same.
Nia dehan, hafoin kaptura suspeitu detein hela iha sela eskuadra postu Same villa hodi hein prosesu investigasaun.
Tuir planu iha loron Segunda (20/02) submete CB ba interrogatóriu dahuluk iha Tribunál Primeira Instánsia Munisípiu Suai. (lcl)
908 total views, 3 views today
