DILI— Ministériu Saúde (MS) liu hosi Diresaun Jerál Protesaun Saúde, servisu hamutuk ho Organizasaun Mundiál Saúde (OMS) realiza workshop advokasia hodi apoiu codex no ai-han seguru iha Timor-Leste.
“MS hamutuk ho liña Ministeriais hotu-hotu hala’o enkontru importante ida kona-ba Codex alimentár nian ne’ebé iha objetivu atu dezamina informasaun kona-ba importánsia ida atu halo tratamentu ba Codex ne’e rasik ho ida-ne’e mak ita halo advokasia Nivel altu hodi apoiu Codex iha Timor-Leste”, dehan Diretora Jerál Protesaun Saúde iha Ministériu Saúde, Odete da Silva Viegas ba jornalista sira iha Otél Novu-Turismu Bidau, Tersa (14/03).
Portantu, Timor-Leste tama membru Codex iha tinan 2018 maibé ho prosesu naruk, Timor-Leste konsege sai membru Codex alimentár hamutuk ho paises 188.
Nia afirma, codex nia papél importante mak oinsá atu bele proteje protesaun ai-han ba konsumidór sira.
Nia dehan, importasaun Ai-han lubuk maibé liña ministerial sira la konsege kontrola laiha responsabilidade nia papál oinsá atu bele prepara ka kapasita rekursu ne’ebé mak iha, prepara mós estandardizasaun ba iha hahán seguru sira no kualidade hodi bele dezenvolve no mós bele kompete iha nivel rejionál no internasionál.
Nia haktuir, ida-ne’e mai husi liña Ministeriais oin-oin parseiru dezenvolvimentu, Instituisaun Públiku no privadu, sei toma responsabilidade oinsá atu haree polítika estratéjia no regulamentu oinsá asegura Ai-han seguru ho kualidade, ida-ne’ebé mak fornese ba komunidade sira bele kompete iha merkadu internasionál ho standard Codex ne’ebé mak iha ona.
“Tanba ita sai ona membru ita mós presiza estabelese ita nia komisaun nasionál ba Codex, tanba ne’e mak bolu liña Ministeriais ne’ebé mak relevante atu bele tama mós ba iha komisaun ida-ne’e, depois ita estabelese tiha komisaun ida-ne’e”, dehan nia.
Nia hatutan, bainhira remata sei kontinua kapasita pontu focal sira, nune’e haree codex ai-han seguru tuir standard ne’ebé relasiona sistema kontrolu Ai-han sira ne’e rasik iha nivel nasionál no internasionál.
Iha fatin hanesan, Reprezentante Organizasaun Mundial da Saúde (OMS), Ardwin Mathur haforsa, workshop ida-ne’e importante tebes atu rekoñese esforsu ne’ebé Governu hala’o hela hodi estabelese padraun ai-han kualidade.
Enkuantu, Timor-Leste sai ona membru ba Komisaun Codex hamutuk ho paises 188, ida-ne’e bele hamosu oportunidade barak, maibé tenke iha responsabilidade, daudaun ne’e prepara sekretariadu konjuntu ida kona-ba servisu saúde hodi haree ba aspetu hotu husi sistema kontrolu ai-han.
“OMS no Ministériu Saúde oras ne’e halo ona avaliasaun ba sistema ai-han no ami haree ba lakuna sira, ne’ebé mak área atu hadi’a maibé buka mós servisu di’ak liu-liu husi produsaun ai-han ba transporte ai-han ba armajenamentu hodi konsumu, ita buka hela forma ida-ne’e atu halimar padraun no prátika hotu-hotu no sira ne’ebé hala’o daudaun ne’e”, hakotu nia.
Entretantu, partisipante iha workshop advokasia nivel alto codex ho ai-han seguru mak hanesan, Diretora Jerál Prestasaun Saúde iha Ministériu Saúde, Odete da Silva Viegas, Reprezentante Organizasaun Mundial da Saúde (OMS) Ardwin Mathur, liña Ministerial sira hanesan, Ministériu Agrikultura no Peska, Ministériu Obras Públiku, Ministériu Finansas, no Ministériu Turizmu Komérsiu Indústria, AIFAESA, Tane Konsumidór inklui Food and Agriculture Organization of the United Nations (FAO).
1,240 total views, 6 views today
Bele hare Video Seluk :