DILI (timorpost.com)—Guarda Prizaun Gleno, Ofisial Sub Xefe, Andre Soares, Sesta (30/06), hakotu iis iha Sentru Saúde Gleno, tanba sofre moras tensaun.
Diretór Prizaun Gleno, Nito Maria do Santos, hatete Prizaun Gleno lakon ofisial guarda sub xefe Andre Soares, tanba sofre moras tensaun.
Ofisial guarda sub xefe Andre Soares foin mak muda husi Prizaun Suai ba iha Prizaun Gleno, iha fulan Abríl tinan ne’e.
“Ohin dadeer mate derrepente de’it, ami mós la hatene, maibé tuir informasaun katak antes ne’e matebian sofre hela moras tensaun”, nia informa ba Timor Post liuhusi telefone, Sesta (30/06).
Nia dehan, ofisial guarda sub xefe ne’e hakotu iis iha Sentru Saúde Gleno, maizumenus tuku 9:26 dadeer.
“Ohin dadeer matebian sei mai hela servisu, halo servisu hanesan baibain, maibé derrepente hetan atakasaun mak ami lori ba ospitál, maibé la konsege salva”, nia informa.
Nia haktuir, matebian orijen husi munisípiu Ermera, ne’ebé mak hanesan guarda prizaun antigu, hala’o kna’ar iha Prizaun Bekora, depois iha tinan 2017 hanesan guarda sub xefe iha Prizaun Suai durante tinan 6, hafoin ne’e matebian husu karta referénsia, hodi muda fali ba iha Prizaun Gleno, iha fulan Abríl tinan ne’e.
“Matebian husik hela nia espoza ho oan na’in-tolu, matebian nia servisu fatin mak iha Prizaun Gleno, mais mate isin lori ba rai iha matebian nia rezidénsia Dili, parte Delta nian, tanba matebian hela iha ne’ebá”, nia relata.
Nia hatete, hanesan responsavel iha Prizaun Gleno, lori Ministériu Justisa nia naran, sente lakon rekursu di’ak ida, ne’ebé kontribui makas tebes ba servisu prizaun nian. Nune’e mós matebian konsege remata ninia kursu mestradu iha administrasaun.
“Ami sente lakon boot, la’ós família de’it mak lakon, maibé Ministériu Justisa liuliu diresaun husi prizional, ami mós lakon ami nia rekursu ida”, nia espresa ho triste.
Diretór Prizaun ne’e relembra katak nia ho matebian hanesan kolega di’ak dezde tinan 2000, matebian ema ida ne’ebé umilde no kontribui sein rezerva ba servisu prizional nian, maibé moris iha mundu ema hotu la espera, tanba vida ne’e mai husi maromak.
Tuir nia, ho auzénsia husi ofisial guarda sub xefe Andre Soares nian, estabelesimentu prizional Gleno, daudaun ne’e hela de’it guarda prizaun na’in-34.
1,209 total views, 3 views today
Bele hare Video Seluk :
Subscribe to Timorpost
