DILI—Partidu polítiku sira atu hahú kampaña eleitorál, FALINTIL Forsa Defeza Timor-Leste (F-FDTL) simu ona diretiva polítika, atu reforsa Polisia Nasionál Timor-Leste (PNTL) to’o hala’o Eleisaun Parlamentár.
Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Domingos Raul ‘Falur Rate Laek’, hatete, komandu simu ona diretiva polítika, atu komunika ho komandu pelotaun ida-idak, hodi bele partisipa iha seguransa.
“Horisehik simu ona diretiva polítika ba apoiu seguransa iha Eleisaun Parlamentár, ami sei komunika ho komandu ida-idak, atu haree no reforsa iha seguransa ho forma ida oinsá,” nia informa hafoin remata audiénsia iha Palasiu Prezidensiál, Bairru-Pité, Sesta (14/04).
Iha audiénsia ne’e mós relata ba Prezidente Repúblika katak, Timor-Leste agora iha hela tinan polítika, tan ne’e mak Xefe Estadu husu F-FDTL ninia kontribuisaun kona-ba seguransa iha komísiu eleitorál ne’e.
Hasoru malu hodi hala’o enkontru regular, tanba Xefe Estadu okupa ho ajenda nasionál no internasionál, ne’ebé foin mak mai atu relata informasaun jerál kona-ba situasaun no andamentu F-FDTL nian.
Alende kona-ba apoiu seguransa, membru F-FDTL liuliu parte lojístika, sei prepara buat barak hanesan transporte, komunikasaun, ai-moruk no ekipamentu ne’ebé presiza, tanba ida ne’e planu integradu.
Apoiu hosi F-FDTL atu reforsa PNTL, hodi asegura kampaña Eleisaun Parlamentár bele la’o ho susesu, tanba partidu polítiku hamutuk 17 mak atu kompete iha eleisaun lejizlativa tinan ne’e.
Nune’e mós kampaña sei hahú iha loron 19 fulan Abríl to’o loron 18 fulan Maiu hafoin tama ba loron 21 fulan Maiu mak populasaun Timor-Leste, liuliu rai laran no rai li’ur ezerse sira ninia direitu, ne’ebé vigor ona iha konstituisaun.
Lalika Envolve Polítika
Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’, hatete, Prezidente Repúblika, José Ramos Horta, hato’o mensajen atu membru F-FDTL lalika envolve-an iha partidu polítiku.
“Prezidente Repúblika ninia mensajen ba F-FDTL atu preparadu hodi partisipa ho másimu, labele envolve iha atividade polítika, tenke implementa dixiplina, militár labele ba manu fali hodi halo problema tun sa’e, balun fali hasoru komunidade no arbiru hasoru sidadaun”, nia hateten.
Komandu F-FDTL firme nafatin hala’o knaar, hodi asegura seguransa rai laran, nune’e kampaña eleitorál to’o Eleisaun Parlamentár bele la’o ho susesu.
Servisu PM Klaru
Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul “Falur Rate Laek” apela ba Polisia Militár (PM), labele hala’o fali servisu Polísia Nasionál Timor-Leste (PNTL) nian.
Nia hatete, atu kaer membru arte marsiais halo krime iha rai laran, ne’e servisu polisia nian.
“Misaun PM nian la’ós atu ba kaer fali arte marsiais, ha’u-nia diretiva klaru tiha ona, horisehik ha’u reuniaun ho Komandu Polísia”, nia hateten hafoin inaugura edifísiu PM iha Baukau, Kinta (13/04/2023).
Nia dehan, servisu hotu iha seguransa, maibé buat krime sei la atende, anaunser intervensaun diretiva polítika mai, ho okazionais mak intervein.
“Krime apaina delitu komún ida entaun ita bele aborda, mais buat seluk ne’e problema polisia nian, para nune’e ita komesa implementa sistema”, nia afirma.
Nia esplika, Polisia Militár nia servisu atu kontrola servisu membru forsa defeza ne’ebé la kumpre servisu, lori sai transporte karreta no motor forsa nian laiha karta autorizasaun, Militár ne’ebé hatais uniforme la loos, laiha lisensa gia de marxa, hemu lanu iha fatin públiku, no halo barullu iha festa privadu.
Nia hatutan, Polísia Militár la’ós ba hala’o fali servisu polisia nian, anaunser iha akontesimentu derrepente iha oin bele atua, maibé entrega ba polisia.
Alende ne’e nia mós husu ba membru PM hotu atu utiliza edifísiu foun refere ho domin no kuida hodi kumpre misaun nu’udar kontrolu ba militár sira.
“Sé ita hanoin atu profesionaliza Polísia Militár para kumpre misaun ho di’ak tenke apoia lojístika”, nia hateten.
Ikus Komandante fitun tolu ne’e, enkoraja Polísia Militár ho inisiativa rasik atu konstrui rasik jardín, fatin parajen ba transporte nune’e iha panorama furak ba edifísiu ne’e.
1,488 total views, 3 views today
Bele hare Video Seluk :