KOVALIMA, (timorpost.com)— Xefe Suku Motai, postu administrativu Suai, munisípiu Kovalima, Nuno José Mesquita Pereira, preokupa, tanba iha postu no sentru saúde balun iha Munisípu Kovalima, sei menus ekipamentu saúde, tanba ne’e nia husu ba governu liuliu Ministériu Saúde ( MS), atu apoiu fasilidade hanesan, kama partu no aimoruk atu nune’e pesoál saúde bele halo atendimentu ba komunidade.
“Iha suku Matai ne’e iha postu saúde ida mak lokaliza iha ne’eba hodi pesoál saúde sira fó atendimentu ba komunidade sira, maibé tuir ha’u nia haree ne’e, iha postu saúde ami nian ne’e menus ekipamentu saúde, hanesan kama partu, aimoruk no fatin inan isin rua atu partu ba mós laiha, inklui seluk tan”, xefe suku Motai, Nuno José Mesquita Pereira, informa ba Timor Post iha Kovalima, Sesta, (09/02).
Nia hatutan, bainhira inan isin rua sira kanotak moras ba iha postu saúde ne’ebé besik maibé menus fasilidade entaun sai problema ba inan isin rua sira.
Aliende ne’e autoridade lokál ne’e mós preokupa kona-ba pesoál saúde ne’ebé menus, tanba foin Governu liuhosi Ministériu Saúde hapara hotu pesoál saúde kontratadu ho voluntáriu iha postu saúde sira.
“Postu saúde iha ami-nia suku, funsionáriu saúde iha na’in-3 mak halo atendimentu ba iha komunidade sira maibé realidade númeru ne’e la sufisiente tanba suku Matai komundade barak liu entaun rekursu ne’ebé iha susar uitoan atu halo atendimentu di’ak liu ba komunidade sira”, nia preokupa.
Tanba ne’e, nu’udar xefe suku sente la satisfas ho fasilidade no pesoál saúde iha postu saúde sira, nune’e nia husu ba Ministériu Saúde tau-matan ba postu saúde sira liuliu kompleta fasilidade no pesoál saúde sira hodi halo atendimentu ba komunidade atu nune’e labele fó impaktu ba komunidade nia vida.
Maske nune’e, ho situasaun ne’e seidauk implika to’o komunidade lakon vida, maibé aimoruk mak menus ba komunidade.
Iha fatin hanesan, xefe suku Belakasak, Leonito Gusmão, hatete hanesan autoridade lokál preokupa tanba povu no komunidade durante kestiona kona-ba menus pesoál saúde atu halo atendimentu ba komunidade. Tanba ne’e, husu ba Governu liuliu Ministériu Saúde oinsá uza programa no polítika ne’ebé halo rekrutamentu ba pesoál saúde sira hodi atende komunidade
“Ita fó fiar nafatin ba Governu liuliu Ministériu Saúde oinsá uza sira polítika ka sistema oinsá mak ita-nia povu sira bele hetan atendimentu ne’ebé di’ak”, nia hatete.
Preokupasaun kona-ba menus fasilidade no pesoál saúde la’os akontese de’it iha munisípiu Kovalima maibé mós akontese iha munisípiu seluk, tanba ne’e ezije Governu liuliu Ministériu Saúde hodi tau-matan ba preokupasaun hirak ne’e.(*)
4,485 total views, 3 views today
Bele hare Video Seluk :
Subscribe to Timorpost
