MANUFAHI, (timorpost.com)– Sentru Saúde Betanu Bee-Metan (SSB), postu administrativu Same, munisípiu Manufahi menus pesoál Saúde hanesan inferméiru no doutór hodi halo tratamentu ba komunidade ne’ebé presiza halo tratamentu.
Tuir Médiku Jerál, Dirsia Alberina Dias Ximenes, hatete suku Betanu iha postu saúde Betanu Bee-Metan ne’e iha sentru saúde rua, maibé pesoál saúde mak la sufisente hodi halo atendimentu ba pasiente sira.
“Iha suku Betanu ne’e populasaun barak hamutuk rihun 6 resin, maibé ami iha sentru saúde rua de’it, nune’e mós ami-nia rekursu umanu mak la sufisiente para halo atendimentu ba iha pasiente sira, tanba sentru saúde rua ne’e iha sentru saúde ida iha partéira na’in-ida no médiku na’in-ida no inklui cleaner ida, maibé sentru saúde ida seluk ne’e inferméiru na’in-ida no asisente inferméira na’in-ida, tanba ne’e ami rekursu umanu mínimu tebes”, dehan Médiku Jerál, Dirsia Alberina Dias Ximenes, ba jornalista sira iha servisu fatin Sentru Saúde Betanu, Segunda, (12/02).
Tanba ne’e, nia rekomenda ba Governu liuhosi Ministériu Saúde para oinsá bele aumenta tan inferméiru no mós partéira nune’e bele halo atendimentu ba pasiente sira.
Antes ne’e, pesoál saúde kontratadu sira iha maibé iha fulan-Dezembru tinan kotuk kontratu remata no Governu liuhosi Ministériu Saúde la kontinua kontratadu sira-nia kontratu tanba ne’e rekursu menus menus tebes.
“Maske durante ne’e menus rekursu maibé ami jere de’it ida-ne’e hodi atende ba iha pasiente sira, maske iha difikuldade maibé ami tenke jere rekursu ne’ebé mak iha hodi halo atendimentu ba populasaun iha suku Betano ne’e”, nia subliña.
Kona-ba ai-moruk iha sentru saúde ne’e sufisiente para halo atendimentu ba komunidade sira ne’ebé presiza halo tratamentu.
“Ha’u servisu iha ne’e tinan 8, ha’u mai iha 2016 maibé pesoál saúde ida partéira ne’e kleur iha ne’e, entaun maske ami rua de’it maibé kada loron ami bele halo atendimentu ba pasiente hamutuk na’in-30 ba leten”, nia afirma.
Kona-ba fasilidade hanesan infraestrutura, bee, eletrisidade no kondisaun sentru saúde ne’e di’ak hela hodi halo atendimentu.(*)
2,745 total views, 3 views today
Bele hare Video Seluk :
Subscribe to Timorpost
