MANUFAHI (timorpost.com) – Iha loron Domingu (10/09), deskonfia parte Oknum Polísia Militár (PM) balun lori kilat ba kasa komunidade nia Karau iha aldeia Selihasan, suku Betano, postu administrativu Same, munisípiu Manufahi.
Ba Timor Post, xefe aldeia Selihasan, suku Betano, Sarurnina da Silva, informa, iha oras madrugada tuku 01:00 OTL, Karau na’in ne’ebé toba hein Karau iha luhan rona kilat tarutu.
Hafoin kilat tarutu, komunidade relata kedas situasaun ne’e ba iha parte autoridade aldeia Selihasan katak, kilat ida tarutu iha ai-laran.
“Hafoin ha’u simu informasaun ne’e, ha’u rasik liga ba Ofisiál Polísia Suku (OPS) Betano no ha’u rasik ba hamutuk ho komunidade sira atu buka tuir, maibé tanba kalan boot ami la ba ai-laran no ami hein de’it iha estrada terminal dalan atu liu ba Ferik Sare, suku Taitudak, postu Alas ninian,” Sarurnina haktuir ba Timor Post iha Manufahi, Domingu (10/09).
Nune’e, nia dehan, bainhira ho komunidade hein iha ne’ebá, iha tuku 04:00 OTL madrugada, sidadaun balun ho armas no karreta ho xapa matríkula A. 28.163 sai mai husi ai-laran.
“Sira ho karreta sai mai ami ho Karau na’in konsege para karreta ne’ebé tula sidadaun refere hodi husu tuir kedas ida lori karreta no ida mata dalan bolu mai tiru karau ne’e no kilat na’in mak se,” nia relata.
Portantu, bazeia ba informasaun ne’ebé Karau na’in rekolla hafoin trava sira iha dalan ne’e identifika kilat refere mai husi instituisaun Polísia Militár (PM).
“Sidadaun ida lori kilat ne’e husi Kelikai mane foun iha aldeia Seluhasan hanesan PM hala’o knaar iha Dili mak mata dalan no lori kilat ne’e ho naran inisiál RDC hanesan veteranus ida,” nia deklara.
Iha atividade kasa ne’e, sira ho rusa rua ho Karau Timor komunidade nian ida. Nune’e Karau ne’ebé sira tiru, karau na’in ho autoridade foti hela Karau nia ulun hodi sai hanesan evidénsia ho Karau nia isin ne’ebé ko’a rahun ona ne’e.
“Ho aktus ne’e hanesan autoridade sente la di’ak, tanba daudaun ne’e lei la’o hela katak, komunidade labele husik animal la’o livre iha villa ho ida ne’e muda ba husik iha ai-laran no dook husi villa, maibé ikus mai ita nia maluk balun ho fali kilat ba estraga fali ne’e halo nusa,” nia kestiona.
Ne’e duni, ho aktus refere hakarak ezije ba parte relevante sira atu identifika armas sira ne’e no tanba sá mak bele fó sai livre arma ba sidadaun balun hodi ba estraga no oho komunidade sira nia karau.
“Aktus ne’e tanba liga ba armas, ho ida ne’e ha’u sei halibur Karau na’in sira atu halo karta ida haruka ba parte relevante atu haree situasaun ne’e, tanba hanesan autoridade somente haree ba parte sivíl, enkuantu liga ba kilat ami laiha podér atu rezolve ba ida ne’e, tanba liga ho armas ne’ebé liga ba forsa ho veteranus,” nia esplika.
Iha tempu hanesan, Prezidente Kombatentes Libertasaun Nasionál munisípiu Manufahi, Tobias Magno kódigu Maksakor, hatete, sidadaun balun lori ema ba kasa komunidade nia karau no mata dalan husi veteranus balun, maibé ida ne’e la’ós reprezenta veteranus mas individu ida.
“Individu ida mak lori naran veteranus no la’ós veteranus mak lori ema mai kasa komunidade nia karau, tanba atu lori veteranus ne’e somente Prezidente Konsellu mak bele, maibé sidadaun individu mak ba ne’e laloos,” nia rejeita.
Maibé, tuir Prezidente Konsellu ne’e, veteranus ne’e tenke koloka ninian an hanesan veteranus, maibé ida lori fali ema ba kasa komunidade nia animal ne’e individu ona.
“Kona-ba lori arma kasa komunidade nia animal ne’e, uluk kedas ha’u kontra hahalok aat sira hanesan ne’e, tanba ita ko’alia proteje animal fuik maibé ikus mai instituisaun balun utiliza fali kilat hodi oho komunidade nia animal ne’e laloos ida,” nia lamenta.
Ho aktus ne’e, Maksakor husu governu atu haree asuntu ida ne’e tanba kartus ho kilat ne’e lori osan estadu mak sosa. Se ko’alia ba korrupsaun aktus ne’e mós parte ida husi korrupsaun.
“Maibé ema ida uza fali armas ne’e hodi ba kasa fali povu nia animal hodi benefisia fali ba nia an ne’e labele. Karik ba kasa komunidade nia animal ne’e hanesan mós krime,” nia hateten.
Portantu, ba aktus ne’e, sira viola ona lei, ne’e duni husu tenke prosesa tuir lei ne’ebé mak iha ona iha Timor-Leste. No ba na’ok komunidade nia animal iha kalan boot ne’e kategoria na’ok ten.
Iha sikun seluk, Komandante komandu polísia munisípiu Manufahi, superintendente Joni Viana das Regras, hatete, ba situasaun ne’e nia parte sei kria enkontru ho komandante postu Betano hodi buka tuir informasaun ne’e.
“Aban (ohin) sei enkontru ho postu Betano hodi buka tuir ida ne’e, tanba ida ne’e relasiona ho militár,” nia hakotu.
Enkuantu, tuir video ho durasaun minutu 1 segundus 24 ne’ebé Timor Post asesu, iha video ne’e komunidade sira ho lian maka’as hakilar hodi temi sai katak Rama na’ok ten no Karau ne’e ulun foti hela hanesan evidénsia no Karau isin husik ba na’ok ten sira lori ba han.
Aktus ne’ebé akontese ne’e hamosu diskusaun maka’as husi intelektuais Manufahi-oan iha grupu rede sosiál Whatsapp katak, hahalok ne’e la di’ak no lamentavel tebes ho situasaun sira hanesan.
3,742 total views, 3 views today
Bele hare Video Seluk :
Subscribe to Timorpost
