MANUFAHI (timorpost.com) – Iha Sesta loron (11/11), akontese Udan ho Anin boot kuaze oras ida nia laran, halo ai-samtuku boot ida Tohar monu taka Metin estrada iha diresaun Darmatan ba Suku Fahinehan.
Tuir sidadaun Martins da Costa, iha Aldeia Daramatan, Suku Fahinehan, Postu Administrativu Fatuberlio, Munisípiu Manufahi, haktuir ai-samtuku monu tanba ohin udan no anin boot.
“Ohin udan no anin boot inklui ho rai lakan, rezulta ai-samtuku boot ida monu taka metin estrada iha area Tete Horok, Nikolau natar, aldeia Daramatan, suku Fahienhan,” haktuir Martins ba Timor Post iha Same, Sesta (11/11) kalan ne’e.
Ai-samtuku boot ne’e monu taka metin estrada difikulta movimentu transporte inklui komunidade la’o ain susar atu ultrapasa husi fatin ne’e.
“Ai-samtuku ne’e boot tebes no monu taka dalan halo movimentu transporte ba no mai la di’ak ona”, nia dehan.
Sikun seluk ba situasaun ne’e Xefe Suku Fahinehan, Postu Administrativu Fatuberlio, António da Conceição Tilman, dehan aban dadersan nia parte sei tun ba haree diretamente.
“Aban dadersan ha’u sei ba haree nune’e bele kontaktu ba parte korpu bombeirus munisípiu Manufahi hodi bele mai tesi”, nia hateten.
Nia hatutan, karik labele sira bele empresta ema nia makina balun hodi tesi.
Tuir observasaun Timor Post, nota ba daudaun Programa Nasionál Dezenvolvimentu Suku (PNDS), halo hela konstrusaun Uma-Kbiit Laek (UKL) no bee moos la’o hela iha suku Fahinehan.
Alende ne’e tuir planu kompañia ida mós atu lori Sesta bázika ba fahe ba komunidade aldeia lima, iha suku Fahinehan, maibé ba situasaun ne’e karreta ho motor inklui transporte domestika hanesan kuda mós labele la’o ba no mai.
1,766 total views, 3 views today
