(Reportájen Luis Casmiro/Editor Suzana Cardoso)
MANUFAHI (Tmor Post) – Tanba moru eskola Ensinu Bazíku Filial (EBF) nia idade tuan ona mak halahuk no hafasil moru ne’e monu tuun hanehan estudante mane ida, hodi rezulta ninia ain kanek grave.
“Moru eskola husi turma primeiru ano mak lahuk ona. Ne’e duni labarik sira halo limpeza besik moru huun ne’e derepente monu hanehan labarik mane ida ninia ain hahu husi ain kabun to’o ain kraik kuaze dodok hotu.”
Esplika Koordenador eskola EBF Selihasan, Joaquim Doutel Sarmento ba Timor post iha Same, Tersa, (18/05/2021).
Hafoin eskola hotu-hotu paradu tanba pandemia Covid-19 hatutan Joaquim, eskola hotu-hotu iha Manufahi kumesa reativa fila fali prosesu aprendizazen. Nune mak antes atu hahu, eskola EBF halo preparasaun ho limpeza.
Katak Joaquim, eskola EBF Selihasan ne’ebé lokaliza iha Aldeia Selihasan, Suku Betano, Postu Administrativu Same, Munisipiu Manufahi ne’e iha tempu feriadu nia kondisaun grave impaktu husi lahalo manutensaun ba eskola ne’e.
Tenik Koordenador EBF ne’e, laiha manutensaun ba kondisaun eskola hafasil moru ne’ebé idade kleur ona hodi lahuk atu monu. Tanba ne’e wainhira estudante ne’e halo hela limpeza besik ne’eba derepente moru ne’e monu halo estudante ne’e halai la biban hodi hanehan kona
nia ain.
Katak Joaquim, moru ne’e monu hanehan estudante ho naran João Pedro (10) klase segundu ano ain tohar no dodok hotu. Daudaun ne’e estudante João, familia lori ona ba iha liman badaen sira iha Wedauberek hodi halo tratamentu.
Konta Joaquim, eskola EBF Selihasan hari’i dezde tempu okupasaun Indonezia. Tanba kleur ona mak moru hirak ne’e nia idade han lahuk hotu. Aliende ne’e eskola ne’e klot mak salaun sira tenki fahe ho estudante klase Primeiro ano. Total estudante nain 122.
“Proposta ba eskola refere durante ne’e ami hatama hotu ona ba Ministeriu Edukasaun. Maibé, to’o agora la rona rezultadu hodi hadia. Nune’e kondisaun eskola kontinua a’at ba nafatin, to’o moru monu hanehan estudante sira,”hateten Joaquim ho nervoju.
Maske katak responsavel eskola EBF ne’e, enjinheiru husi Ministeriu Eduaksaun mai sukat ona. Maibé to’o agora seidauk realiza serbisu atu hadia. Lahatene bainhira mak bele hadia eskola ne’e.
“Dadaun ne’e aman-inan husi estudante ne’ebé sai vitima ne’e mai hakilar ami iha eskola ba situasaun ne’e. Ne’e duni husu governu tenki hare situasaun ne’e ho seriu,” ezizi responsavel eskola EBF Selihasan Joaquim.(Le’e notísia seluk iha jornál Timor Post)
1,183 total views, 3 views today
Bele hare Video Seluk :