MANUFAHI—Ekipa gabinete Prezidente Repúblika (PR) hasoru malu ho administradór munisípiu Manufahi no lideransa komunitariu sira hodi prepara ba vizita Prezidente Repúblika (PR) José Manuel Ramos Horta iha Manufahi Sexta (17/03).
Iha enkontru preparasaun ne’e xefe ekipa gabineti Prezidente Repúblika, Julio Gonsalves aprezenta, objetivu husi enkontru atu halo kordenasaun ho autoridade munisípiu no lideránsa komunitária sira hodi hala’o preparasaun ba vizita PR José Manuel Ramos Horta.
“Vizita prezidente mai Manufahi ne’e atu halo lansamentu kuda ai Kakau oan iha kapitál munisípiu Manufahi ne’ebé sei realiza iha Sexta loron (17/03)”dehan Julio liu husi enkontru iha salaun administrasaun munisípiu Manufahi, Kuarta (15/03).
Fatin hanesan Administradór Munisípiu Manufahi (AMM), Arantes Isaac Sarmento reforsa tan katak, enkontru ne’e atu halo preparasaun ba vizita PR mai Manufahi.
Tanba vizita sua execelensia ninian ne’e liliu ba programa lansamentu kuda Kakau oan neduni lideransa komunitária sira bele intende didi’ak aktividade no preparasaun hodi simu vizita xefe estadu.
Tuir observasaun jornalista Timor post nota katak, entertantu refere foka mós kona-ba preparasaun atu hodi simu xefe estadu ho resepsaun kulturál no tradisaun kultural povu Manufahi ninian.
Enkunatu hafoin remata enkontru iha Kuarta (15/03) administrasaun munisípiu prepara kedas karta sirkular ida hodi fahe ba Diretores serbisu municipais no serbisu delegasaun sira iha Manufahi, prezidente konsellu veteranus munisípiu. Seguransa inklui funsionariu no entidade hotu iha Manufahi husu atu partisipa masimu iha vizita prezidente hodi halo kampaña nasional ba kuda ai kakau oan.
Iha karta sirkular ne’e administrasaun munisípiu husu diretores serbisu municipais, delegasaun teritoriu, prezidente konsellu veteranus munisípiu, komandante polisia munisípiu, komandante Autoridade Protesaun Sivil (APC) ba simu xefe estadu iha Lesuati, suku Holarua iha oras tuku 09:000 dader.
Ba funsionariu hotu-hotu atu partisipa iha seremonia ba lansamentu kuda ai Kakau oan iha area Mari Mata, suku Letefoho, postu Same.
Husu mós administrador postu administrativu Same mobiliza xefe suku fatin ualu (8) mak hanesan Holarua, Letefoho, Babulu, Betano, Daisua, Grotu, Rotuto no xefe suku Tutuluro ho estrutura kompostu husi lia na’in, joven feto no mane, xefe aldeia, delegadu no delegada sira.
Aliende ne’e ba suku Letefoho ho estrutura atu mobiliza komunidade husi aldeia Rai-Ubu, Aululi, Ladiki, Rialau, Bairo Malus Hun, Welala, no Sarmata hodi partisipa iha vizita PR ne’e.
Ba xefe suku Holarua ho estrutura atu mobiliza komunidade aldeia Fatuku no Urfu atu partisipa mós iha vizita xefe estadu ne’e. Xefe suku Babulo ho estrutura mobiliza komunidade ne’ebé besik atu hola parte mós iha vizita PR.
Enkuantu ba Diretor serbisu edukasaun munisípiu atu orienta Diretor eskola sekundariu jeral 1912, ESTV-COVEM, ETV Akadiru Hun Same, sekundariu COSAMAR, Diretor EBC Dilijénsia EBC Fatuku atu mobiliza estudante sira partisipa hodi simu xefe estadu iha Mari Mata hahú oras tuku 08:00 dader.(lcl).
506 total views, 3 views today
